വിദ്യാർഥികളെ കയറ്റാതെ പാഞ്ഞ സ്വകാര്യ ബസ് പിന്നോട്ടെടുപ്പിച്ച് മോട്ടോർവാഹന വകുപ്പ് ഉദ്യോഗസ്ഥർ

വിദ്യാർഥികളെ കയറ്റാതെ പോയ സ്വകാര്യ ബസ് പിന്നോട്ട് എടുപ്പിച്ച് മോട്ടോർവാഹന വകുപ്പ്. വ്യാഴാഴ്ച വൈകിട്ട് അഞ്ച് മണിയോടെയാണ് സംഭവം. കൽപ്പറ്റ എസ്‌കെഎംജെ ഹയർസെക്കൻഡറി സ്‌കൂളിന് മുന്നിലാണ് സ്വകാര്യ ബസ് നിർത്താതെ പോയത്. കൽപ്പറ്റയിലേക്ക് വരികയായിരുന്ന ബസിനു നേരെ വിദ്യാർഥികൾ കൈ കാണിച്ചെങ്കിലും നിർത്താതെ പോകുകയായിരുന്നു.

ബസ് നിർത്താതെ പോകുന്നത് ഇതുവഴി വന്ന മോട്ടോർ വാഹന വകുപ്പ് ഉദ്യോഗസ്ഥരുടെ ശ്രദ്ധയിൽപ്പെട്ടു. ഇതോടെ ഉദ്യോഗസ്ഥ സംഘം ബസ് തടഞ്ഞ് പിന്നോട്ടെടുക്കാൻ ആവശ്യപ്പെട്ടു. പിന്നാലെ വിദ്യാർത്ഥികളെ കയറ്റാനും നിർദ്ദേശിക്കുകയായിരുന്നു. നൂറ് മീറ്ററോളമാണ് ബസ് പിന്നോട്ടെടുപ്പിച്ച് സ്റ്റോപ്പിലെത്തിച്ചത്. പരിശോധന തുടരുമെന്നും വിദ്യാർഥികളെ കയറ്റാത്ത ബസുകൾക്കെതിരെ നടപടി സ്വീകരിക്കുമെന്നും അധികൃതർ വ്യക്തമാക്കി.