രാജ്യത്തിന്റെ ആദ്യ സൗര ദൗത്യമായ ആദിത്യ എൽ1-ന്റെ മൂന്നാം ഘട്ട ഭ്രമണപഥം ഉയർത്തലും വിജയകരം. എക്സിലൂടെയാണ് ഐഎസ്ആർഒ വിവരം പങ്കുവെച്ചത്. ഭൂമിയിൽ നിന്നും 296-71,767 കിലോമീറ്റർ അകലെയായുള്ള ഭ്രമണപഥത്തിലാണ് പേടകം ഉള്ളത്. നാലാം ഘട്ട ഭ്രമണപഥം സെപ്റ്റംബർ 15-നാണെന്ന് ഐഎസ്ആർഒ അറിയിച്ചു. പുലർച്ചെ രണ്ട് മണിക്കാണ് നാലാം ഘട്ട ഭ്രമണപഥം ഉയർത്തൽ നടക്കുക.
ഇതിനോടകം തന്നെ രണ്ട് തവണ ഭ്രമണപഥം ഉയർത്തിയിരുന്നു. ആദ്യ ഭ്രമണപഥം ഉയർത്തൽ സെപ്റ്റംബർ മൂന്നിനും രണ്ടാം ഘട്ട ഭ്രമണപഥം ഉയർത്തൽ സെപ്റ്റംബർ അഞ്ചിനുമായിരുന്നു നടന്നത്. നാലാം ഘട്ട ഭ്രമണപഥം ഉയർത്തൽ വിജയകരമായി പൂർത്തിയാക്കിയതിന് ശേഷമാകും പേടകം ഭൂമിയുടെ ഭ്രമണപഥം വിട്ട് ഒന്നാം ലഗ്രാഞ്ച് പോയിന്റിലേക്കുള്ള യാത്ര ആരംഭിക്കുക.
നാല് മാസം അഥവാ 125 ദിവസം നീളുന്ന യാത്രയാണ് ആദിത്യ എൽ-1ന്റേത്. ഭൂമിയിൽ നിന്നും 15 ലക്ഷം കിലോമീറ്റർ അകലെയായുള്ള ഒന്നാം ലഗ്രാഞ്ച് പോയിന്റാണ് ലക്ഷ്യസ്ഥാനം.
