കോഴിക്കോട്: തൊഴിലാളി സംഘടനാ നേതാവും മനുഷ്യവകാശ പ്രവർത്തകനുമായ ഗ്രോ വാസുവിനെതിരായ കേസിൽ പോലീസിനെ ശകാരിച്ച് കോടതി. കോടതി നിർദേശം ലംഘിച്ച് കോടതി വരാന്തയിൽ ഗ്രോ വാസു മുദ്രാവാക്യം വിളിച്ചതിനാണ് പോലീസിനെതിരെ നടപടിയെടുക്കേണ്ടി വരുമെന്ന് കോടതി നിരീക്ഷിച്ചത്.
മാവോയിസ്റ്റുകളുടെ മൃതദേഹങ്ങൾ സൂക്ഷിച്ച മോർച്ചറിക്കു മുമ്പിൽ സംഘം ചേരുകയും മാർഗ തടസം സൃഷ്ടിക്കുകയും ചെയ്തെന്ന കേസിൽ കോടതിയിൽ ഹാജരാക്കി ജയിലിലേക്ക് മടക്കികൊണ്ടു പോകുന്നതിനിടെയായിരുന്നു മുദ്രാവാക്യം വിളി. കേസിലെ നാലാം സാക്ഷിയും മെഡിക്കൾ കോളേജ് സ്റ്റേഷനിലെ സിപിഒയുമായ ജയചന്ദ്രൻ ഗ്രോ വാസു പ്രതിഷേധിക്കുന്നത് കണ്ടതായി കോടതിയെ അറിയിച്ചു.
കോടതി വരാന്തയിൽ മുദ്രാവാക്യം വിളിക്കാന്‍ അനുവദിക്കരുതെന്ന് കോടതി പോലീസിനോട് നിർദേശിച്ചിരുന്നു. കഴിഞ്ഞ രണ്ടുതവണയും കോടതിയില്‍ ഹാജരാക്കി മടക്കിക്കൊണ്ടുപോകുന്നതിനിടെ അദ്ദേഹം മുദ്രാവാക്യം വിളിച്ചിരുന്നു. ഇക്കാര്യത്തില്‍ ഇനിയൊരു വീഴ്ചയുണ്ടായാല്‍ പൊലീസിനെതിരെ നടപടിയുണ്ടാകുമെന്ന് കോടതി താക്കീത് നല്‍കി.
ആദ്യതവണ ഗ്രോവാസുവിന്റെ വായ മറച്ചുപിടിച്ച പോലീസിന്റെ നടപടി വലിയ പ്രതിഷേധത്തിന് ഇടയാക്കിയിരുന്നു. തുടര്‍ നടപടികള്‍ക്കായി കേസ് പതിനൊന്നാം തീയതിയിലേക്ക് മാറ്റി.
പ്രതികരിക്കാൻ ഇവിടെ എഴുതുക: