തിരുവനന്തപുരം: മുതലപ്പൊഴിയില് മത്സ്യബന്ധന വള്ളം വീണ്ടും അപകടത്തില്പ്പെട്ടു. മത്സ്യ ബന്ധനം കഴിഞ്ഞെത്തിയ വള്ളം അഴിമുഖത്തെ മണല്തിട്ടയില് ഇടിച്ച് നിയന്ത്രണം നഷ്ടപ്പെടുകയായിരുന്നു. പുതുക്കുറിച്ചി സ്വദേശി അനിലിന്റെ നജാത്ത് എന്ന വള്ളമാണ് അപകടത്തില്പെട്ടത്. വള്ളത്തില് 26 മത്സ്യത്തൊഴിലാളികള് ഉണ്ടായിരുന്നതില് ആര്ക്കും പരിക്കില്ല. കേടുപാടുകള് സംഭവിച്ച വള്ളം മുതലപ്പൊഴി ഹാര്ബറിലേക്ക് നീക്കി.
കഴിഞ്ഞ ദിവസവും അഴിമുഖത്ത് സമാന അപകടം ഉണ്ടായിരുന്നു. 33 മത്സ്യതൊഴിലാളികളുമായി വള്ളം നിയന്ത്രണം വിട്ട് പുലിമുട്ടിലേക്ക് ഇടിച്ച് കയറുകയായിരുന്നു.
മത്സ്യത്തൊഴിലാളി സുരക്ഷയ്ക്കായി ഏര്പ്പെടുത്തിയിട്ടുളള മറൈന് എന്ഫോഴ്സ്മെന്റിന്റെ ബോട്ടും ഇന്നലെ അപകടത്തില് പെട്ടു. അദാനി ഗ്രൂപ് നടത്തി വന്ന ഡ്രഡ്ജിംഗ് ഉള്പ്പെടെയുളള പ്രവര്ത്തികള് മൂന്നാഴ്ച്ചയിലേറെയായി മുടങ്ങിയിരിക്കുകയാണെന്ന് മത്സ്യതൊഴിലാളികള് കുറ്റപ്പെടുത്തുന്നു. അഴിമുഖത്തെ മണ്ണ്നീക്കി ആഴം കൂട്ടിയില്ലെങ്കില് ഇനിയും അപകടങ്ങള് ഉണ്ടാകുമെന്ന് അവര് പറഞ്ഞു.
