താമരശ്ശേരിയിലെ മയക്കുമരുന്ന് കേന്ദ്രം; നടപടി ആവശ്യപ്പെട്ട പ്രദേശവാസികൾക്ക് നേരെ വധഭീഷണി

കോഴിക്കോട്: താമരശേരി അമ്പലമുക്ക് കൂരിമുണ്ടയിൽ ഒരു വർഷത്തിൽ അധികമായി മയക്കുമരുന്ന് കേന്ദ്രം പ്രവർത്തിക്കുന്നതായി പ്രദേശവാസികളുടെ പരാതി. പ്രദേശത്ത് നടക്കുന്ന അക്രമങ്ങളെ തുടർന്ന് പ്രദേശവാസികൾ പരാതി നൽകിയിരുന്നു. ഇതിന് പിന്നാലെ നാലംഗ സംഘമെത്തി ഇവർക്കെതിരെ വധഭീഷണി മുഴക്കി. പരാതി നൽകിയെങ്കിലും പോലീസിന്റെ ഭാഗത്ത് നിന്നും കാര്യമായ അന്വേഷണം ഉണ്ടാകുന്നില്ലെന്നാണ് നാട്ടുകാരുടെ ആരോപണം. സംഘത്തിൽ ഉൾപ്പെട്ടവരെ കണ്ടെത്തുന്നതിനുള്ള അന്വേഷണം പുരോഗമിക്കുന്നുവെന്നാണ് പോലീസുകാരുടെ വാദം.

കഴിഞ്ഞ ദിവസമാണ് പ്രദേശത്ത് വൻ മയക്കുമരുന്ന് ക്യാമ്പ് കണ്ടെത്തുന്നത്. ഷെഡ് കെട്ടിയുണ്ടാക്കിയ ക്യാമ്പിൽ മയക്കുമരുന്ന് ഉപയോഗവും വിൽപ്പനയും പതിവാണ്. ഇവിടെ ആയുധങ്ങളുമായി ആളുകളും നായകളും കാവലുണ്ടെന്ന് പ്രദേശവാസികൾ പറയുന്നു. ലഹരി മാഫിയ ആക്രമിച്ച വീടിന് സമീപത്തായാണ് പോലീസ് മയക്കുമരുന്ന് ക്യാമ്പ് കണ്ടെത്തിയത്. വീട്ടിൽ സിസിടിവി സ്ഥാപിച്ചതിൽ പ്രകോപിതരായി ആക്രമണം നടത്തുകയായിരുന്നു.