ഏകദിന ലോകകപ്പ് ക്രിക്കറ്റ് ജഴ്സിയില്‍ ‘ഭാരത്’ എന്ന് മതി ;ഇന്ത്യ എന്നത് ബ്രിട്ടീഷുകാര്‍ നല്‍കിയ പേരെന്നും സെവാഗ്

ന്യൂദല്‍ഹി: ഏകദിന ലോകകപ്പ് ക്രിക്കറ്റില്‍ ഇന്ത്യയുടെ ജഴ്സിയില്‍ ഇന്ത്യ എന്ന് വേണ്ടെന്നും പകരം ‘ഭാരത്’ മതിയെന്നും വീരേന്ദ്ര സെവാഗ്. ഇന്ത്യ എന്നത് ബ്രിട്ടീഷുകാര്‍ നല്‍കിയ പേരാണെന്നും വീരേന്ദ്ര സെവാഗ് വിശദമാക്കി.

സമൂഹമാധ്യമമായ എക്സില്‍ ആയിരുന്നു വീരേന്ദ്ര സെവാഗിന്റെ ഈ പ്രതികരണം. ഭാരതം എന്ന പേര് ഔദ്യോഗികമായി തന്നെ പുനസ്ഥാപിക്കേണ്ട സമയമാണിത്. നമ്മളെല്ലാം ഭാരതീയരാണ്. ഇന്ത്യ എന്ന പേര് നല്‍കിയത് ബ്രിട്ടീഷുകാരാണ്. ‘ഭാരത്’ എന്ന ശരിയായ പേരിലേക്ക് പോകാന്‍ നമ്മള്‍ ഏറെ വൈകിയിരിക്കുന്നു എന്നും സെവാഗ് കുറിച്ചു.

ഏകദിന ലോകകപ്പില്‍ ഇന്ത്യന്‍ താരങ്ങളുടെ നെഞ്ചില്‍ ‘ഭാരത്’ എന്ന പേര് വരുന്നതിന് ബിസിസിഐയും ജയ് ഷായും സത്വര നടപടികള്‍ കൈക്കൊള്ളണമെന്നും വീരേന്ദ്ര സെവാഗ് ആവശ്യപ്പെട്ടു.

I have always believed a name should be one which instills pride in us.
We are Bhartiyas ,India is a name given by the British & it has been long overdue to get our original name ‘Bharat’ back officially. I urge the @BCCI @JayShah to ensure that this World Cup our players have… https://t.co/R4Tbi9AQgA

— Virender Sehwag (@virendersehwag) September 5, 2023

1996ല്‍ നെതര്‍ലാന്‍റ്സ് കളിച്ചത് ഹോളണ്ട് എന്ന പേരിലായിരുന്നു. എന്നാല്‍ 2003ല്‍ ഇന്ത്യ അവരെ നേരിടുമ്പോള്‍ പേര് നെതര‍്ലാന്‍റ്സ് എന്നാക്കി മാറ്റി. ബ്രിട്ടീഷുകാരാണ് ബര്‍മ്മ എന്ന പേര് നല്‍കിയത്. എന്നാല്‍ ആ രാജ്യം ഇപ്പോള്‍ പഴയ മ്യാന്‍ മര്‍ എന്ന പേരിലേക്ക് മാറിയെന്നും സെവാഗ് എഴുതി.

ഇന്ത്യയുടെ പേര് ഭാരത് എന്നാക്കാന്‍ കേന്ദ്രസര്‍ക്കാര്‍ നീക്കം നടത്തുന്നുതായി വാര്‍ത്ത പ്രചരിക്കുന്നുണ്ട്. പാര്‍ലമെന്‍റിന്റെ പ്രത്യേക സമ്മേളനത്തില്‍ ഇത് സംബന്ധിച്ച് പ്രമേയം കൊണ്ടുവരുമെന്ന അഭ്യൂഹം ശക്തമാണ്. ജി20 ഉച്ചകോടിയില്‍ പങ്കെടുക്കുന്ന രാഷ്‌ട്രത്തലവന്‍മാര്‍ക്കുള്ള ഔദ്യോഗിക ക്ഷണത്തില്‍ രാഷ്‌ട്രപതി ദ്രൗപദി മുര്‍മു ഇന്ത്യന്‍ രാഷ്‌ട്രപതി എന്നതിന് പകരം പ്രസിഡന്‍റ് ഓഫ് ഭാരത് എന്ന് കുറിച്ചതോടെയാണ് പുതിയ ഊഹപോഹങ്ങള്‍ ശക്തമായത്. സെപ്തംബര്‍ ഒമ്പതിന് നടക്കുന്ന അത്താഴ വിരുന്നിലേക്ക് ജി20 നേതാക്കളെയും മുഖ്യമന്ത്രിമാരെയും ക്ഷണിച്ചുകൊണ്ടുള്ള കത്തിലാണ് രാഷ്‌ട്രപതി ദ്രൗപദി മുര്‍മു പ്രസിഡന്‍റ് ഓഫ് ഭാരത് എന്ന് കുറിച്ചത്.