ഓണംകോട് വന്‍ മോഷണം, വീടുകുത്തി തുറന്ന് കള്ളന്‍ തുണിവരെ കട്ടുകൊണ്ടു പോയിയെന്ന് പരാതി

മാറനല്ലൂർ: പൂട്ടിയിട്ടിരുന്ന വീട്ടിൽ നിന്നും പണവും, ഗൃഹോപകരണങ്ങളും ഉൾപ്പെടെ കടത്തി. പൂവച്ചൽ ഓണംകോട് സിമി ഭവനിൽ സരളയുടെ വീട്ടിൽ ആണ് മോഷണം നടന്നതായി കാട്ടാക്കട പോലീസിൽ പരാതി ലഭിച്ചത്.

ഓണം പ്രമാണിച്ച് കഴിഞ്ഞ ഒരാഴ്ചയായി സരളയുടെ മകൾ സിമി യുടെ വീട്ടിലായിരുന്നു കുടുംബം. കഴിഞ്ഞ ദിവസം വീട്ടുകാർ മടങ്ങിയെത്തിയപ്പോഴാണ് വീട് കുത്തിത്തുറന്ന നിലയിൽ കണ്ടെത്തിയതും മോഷണം സ്ഥിരീകരിച്ചതും.

വീടിന്റെ മുൻ വാതിൽ കുത്തിപ്പൊളിച്ച് ഉള്ളിൽ കടന്നാണ് മോഷണം നടത്തിയിട്ടുള്ളത്. അലമാരകൾ, മേശകൾ ഉൾപ്പെടെ എല്ലാം കുത്തിപ്പൊളിച്ചിരുന്നു. 42,000 രൂപ, മിക്സി, സാരി ഉൾപ്പെടെയുള്ള വസ്ത്രങ്ങൾ, വൈദ്യുത ഉപകരണങ്ങൾ, ഗൃഹോപകരണങ്ങൾ, വെങ്കല പാത്രങ്ങൾ എന്നിവയെല്ലാം നഷ്ടപ്പെട്ടതായി പരാതിയിൽ പറയുന്നു. കാട്ടാക്കട പോലീസ് സ്ഥലത്തെത്തി തെളിവെടുത്തു.