പട് ന: ഹിന്ദു സനാതന ധർമ്മത്തെ ഉന്മൂലനം ചെയ്യണമെന്ന ഡി എം കെ നേതാവും തമിഴ് നാട് മന്ത്രിയുമായ ഉദയനിധി സ്റ്റാലിന്റെ വിദ്വേഷ പ്രസ്താവനക്കെതിരെ ബിഹാറിലെ മുസാഫർപൂർ കോടതിയിൽ പരാതി. മുസാഫർപൂരിലെ അഭിഭാഷകന് സുനിൽ കുമാർ ഓജയാണ് മുസാഫർപൂർ സിവിൽ കോടതിയിൽ പരാതി നൽകിയത്.
ഉദയനിധി നടത്തിയ ഹിന്ദു സനാതന ധര്മ്മം ഉന്മൂലനം ചെയ്യണമെന്ന ആഹ്വാനം രാജ്യത്തുടനീളമുള്ള ഹിന്ദുക്കളുടെ വികാരം വ്രണപ്പെടുത്തിയെന്ന് പരാതിക്കാരൻ ആരോപിച്ചു. ‘ഉദയനിധിയുടെ ഈ പ്രസ്താവന ഹിന്ദുമതത്തിലും സനാതന ധർമ്മത്തിലും വിശ്വസിക്കുന്ന രാജ്യത്തുടനീളമുള്ള കോടിക്കണക്കിന് ആളുകളുടെ മതവികാരം വ്രണപ്പെടുത്തി.
“രാഷ്ട്രീയ മുതലെടുപ്പിന് വേണ്ടിയാണ് പ്രതി ഇത്തരമൊരു പ്രസ്താവന നടത്തിയത്. ഇത്തരം സാഹചര്യത്തിൽ പ്രതികൾക്കെതിരെ കർശന നിയമനടപടി സ്വീകരിക്കണം”- സുനിൽ കുമാർ ഓജ പരാതിയില് ആവശ്യപ്പെട്ടു. സെപ്തംബർ 14ന് കോടതി കേസ് പരിഗണിക്കും.
ഉദയനിധിക്കെതിരെയുള്ള രണ്ടാമത്തെ പരാതിയാണിത്. കോടിക്കണക്കിന് ഹിന്ദുക്കളുടെ വികാരം വ്രണപ്പെടുത്തിയതിന് കർശന നടപടിയെടുക്കണമെന്ന് ആവശ്യപ്പെട്ട് സുപ്രീം കോടതി അഭിഭാഷകൻ വിനീത് ജിൻഡാൽ നേരത്തെ ദൽഹി പോലീസിൽ പരാതി നൽകിയിരുന്നു. ഈ പരാതിയുടെ അടിസ്ഥാനത്തില് ദല്ഹി പൊലീസ് വിവിധ വകുപ്പുകള് പ്രകാരം കേസെടുത്തിരുന്നു. ഇന്ത്യന് ശിക്ഷാ നിയമത്തിലെ 120ബി, 183എ, 295,504 എന്നീ വകുപ്പുകള് പ്രകാരമാണ് കേസെടുത്തിരിക്കുന്നത്.
