ഗുരുവായൂര്: പൊന്നോണത്തിന്റെ വരവറിയിച്ചുള്ള ഉത്രാടം ദിനമായ നാളെ ശ്രീഗുരുവായൂരപ്പന് തിരുമുല്ക്കാഴ്ച്ചയായി ഭക്തരുടെ ഉത്രാട കാഴ്ച്ചക്കുല സമര്പ്പണം നടക്കും. നിസ്വാര്ത്ഥ ഭക്തിയുടെ നിറവിലും, ഹരിനാമ കീര്ത്തനങ്ങളുടെ മന്ത്രധ്വനിയിലുമാണ് ഉത്രാടദിനത്തില് കരുണാമയന്റെ അകത്തളത്തില് കാഴ്ച്ചക്കുല സമര്പ്പണം നടക്കുക. രാവിലെ ശീവേലിക്ക് ശേഷം, സ്വര്ണ കൊടിമരച്ചുവട്ടില് അരിമാവണിഞ്ഞ തറയില് നാക്കിലയും, നിറഞ്ഞുകത്തുന്ന നെയ്വിളക്കും, വിഘ്നേശ്വരന് നാളികേരവും വെച്ച്, മാരാരുടെ ശംഖധ്വനിക്കിടെ ക്ഷേത്രം മേല്ശാന്തി തോട്ടം ശിവകരന് നമ്പൂതിരി ഭഗവാന് ആദ്യ കാഴ്ച്ചക്കുല സമര്പ്പിക്കും. തുടര്ന്ന് ക്ഷേത്രം ഊരാളന് മല്ലിശ്ശേരി പരമേശ്വരന് നമ്പൂതിരിപ്പാട്, ദേവസ്വം ചെയര്മാന് ഡോ. വി.കെ. വിജയന്, ഭരണസമിതി അംഗങ്ങള്, ദേവസ്വം അഡ്മിനിസ്ട്രേറ്റര് കെ.പി. വിനയന്, കൂടാതെ നൂറുകണക്കിന് ഭക്തരും ഭഗവാന് തിരുമുല്ക്കാഴ്ച്ച സമര്പ്പിക്കും.
മറ്റൊരു ക്ഷേത്രത്തിലും കാണാനാകാത്തവിധം ഭക്തിരസം തുളുമ്പുന്ന കാഴ്ചയാണ്, ഗുരുവായൂര് ക്ഷേത്രത്തിലെ കാഴ്ച്ചക്കുല സമര്പ്പണം. മേല്ശാന്തിയും, ദേവസ്വം ഭരണാധികാരികളും കാഴ്ച്ചക്കുല സമര്പ്പിച്ച ശേഷം ഇടതടവില്ലാതെ ഭക്തര് കാഴ്ച്ചക്കുല സമര്പ്പിക്കുന്നതോടെ, വാതാലയേശന്റെ തിരുസന്നിധി, നിമിഷനേരം കൊണ്ട് സ്വര്ണവര്ണ ഗോപുരമായി മാറും. അത്താഴപ്പൂജ കഴിഞ്ഞ് നടയടയ്ക്കുന്നതുവരെ ഭക്തരുടെ കാഴ്ചക്കുല സമര്പ്പണം തുടരും.
ദേവസ്വം ഭൂമി പാട്ടത്തിനെടുത്തവരായിരുന്നു, പഴയ കാലത്ത് കാഴ്ച്ചക്കുലകള് ക്ഷേത്രത്തില് സമര്പ്പിച്ചിരുന്നത്. അതുകൊണ്ട് ‘പാട്ടക്കുലകള്’ എന്ന പേരിലായിരുന്നു അന്ന് അറിയപ്പെട്ടിരുന്നത്. പാട്ടഭൂമികള് ഇല്ലാതായപ്പോള് ആ നിലയ്ക്കുള്ള കാഴ്ച്ചക്കുലകളും ഇല്ലാതായി. പിന്നീട് അത് ഭക്തരുടെ കാഴ്ച്ചക്കുല സമര്പ്പണമായി മാറുകയായിരുന്നു. ലഭിച്ച പഴക്കുലകളില് ഒരുവിഹിതം ഭഗവാന്റെ ആനകള്ക്കും, ഒരുവിഹിതം ഭക്തര്ക്ക് നല്കുന്ന തിരുവോണസദ്യക്ക് പഴപ്രഥമനുമായി നീക്കിവെക്കും. ബാക്കിവന്ന കുലകള് ക്ഷേത്രത്തിന് പുറത്തുവെച്ച് ഭക്തര്ക്കായി ലേലം ചെയ്യും.
ശ്രീഗുരുവായൂരപ്പന് നാളെ ഉത്രാട കാഴ്ച്ചക്കുല സമര്പ്പണം
ബന്ധപ്പെട്ട വാര്ത്തകള്
പുതിയ വാര്ത്തകള്
ജന്മഭൂമി ഓണ്ലൈന്© Mathruka Pracharanalayam Limited.
Tech-enabled by Ananthapuri Technologies.