ഡബ്ലിന്‍: അയര്‍ലന്‍ഡിനെതിരായ ടി20 പരമ്പരയിലെ മൂന്നാമത്തെയും അവസാനത്തെയും മത്സരം മഴ മൂലം ഉപേക്ഷിച്ചു. നേരത്തെ ആദ്യ രണ്ട് ടി 20കളും ടീം ഇന്ത്യ വിജയിച്ചിരുന്നു. ഡബ്ലിനില്‍ മഴ മൂലം ടോസ് പോലും ഇടാന്‍ കഴിഞ്ഞില്ല.
ഇന്ത്യ- അയര്‍ലന്‍ഡ് മൂന്നാം ടി20 ഉപേക്ഷിച്ചതോടെ ഏഷ്യാ കപ്പിന് മുമ്പുള്ള ഇന്ത്യയുടെ എല്ലാ മത്സരങ്ങളും അവസാനിച്ചു.ആദ്യ ടി 20 മഴനിയമം പ്രകാരം രണ്ട് റണ്‍സിന് ഇന്ത്യ വിജയിച്ചിരുന്നു. രണ്ടാമത്തെ മത്സരം 33 റണ്‍സിനും വിജയിച്ചു.പരമ്പര ഇന്ത്യ 2-0ന് സ്വന്തമാക്കി.
മൂന്നാം ടി 20ഉപേക്ഷിച്ചത് മലയാളി വിക്കറ്റ് കീപ്പര്‍ ബാറ്റര്‍ സഞ്ജു സാംസണിന് തിരിച്ചടിയായി. ഏഷ്യാ കപ്പിനുള്ള 17 അംഗ ടീമില്‍ ഉള്‍പ്പെടാത്തതിനാല്‍ അയര്‍ലന്‍ഡിനെതിരായ മൂന്നാം ടി20 ഏകദിന ക്രിക്കറ്റ് ലോകകപ്പിന് മുമ്പ് മികവ് കാട്ടാനുളള അവസാന അവസരമായിരുന്നു സഞ്ജുവിന്.
ലോകകപ്പ് ടീം പ്രഖ്യാപനത്തിന് മുമ്പ് സഞ്ജുവിന് ഇന്ത്യക്ക് വേണ്ടി ഇനി മത്സരമില്ല. റിസര്‍വായാണ് ഉള്‍പ്പെടുത്തിയിരിക്കുന്നത് എന്നതിനാല്‍ ഏഷ്യാ കപ്പില്‍ സഞ്ജുവിന് അവസരം ലഭിക്കാനുള്ള സാധ്യത വിരളമാണ്.
പ്രതികരിക്കാൻ ഇവിടെ എഴുതുക: