പറ്റ്ന: ബിഹാറിലെ മാധ്യമപ്രവർത്തകനായിരുന്ന വിമൽ കുമാർ യാദവിനെ വെടിവച്ചു കൊന്ന കേസിൽ 4 പേർ അറസ്റ്റിലായി. വിപിൻ യാദവ്, ഭവേഷ് യാദവ്, ആശിഷ് യാദവ്, ഉമേഷ് യാദവ് എന്നിവരാണ് വിവിധയിടങ്ങളിൽ നിന്നായി അറസ്റ്റിലായത്. ഇതോടെ കേസിൽ അറസ്റ്റിലായവരുടെ എണ്ണം ആറായി. കൊലക്കേസിൽ ഉൾപ്പെട്ട മറ്റു രണ്ട് പേർക്കു വേണ്ടിയുള്ള അന്വേഷണം തുടരുകയാണ്.
വെള്ളിയാഴ്ച രാവിലെയാണ് ബിഹാറിലെ അരാരിയയിൽ വച്ച് ദൈനിക് ജാഗരൺ ലേഖകൻ വിമൽ കുമാർ യാദവ് കൊല്ലപ്പെട്ടത്. വിമൽകുമാറന്റെ വാതിലിൽ തട്ടി വിളിച്ച് വെടിവയ്ക്കുകയായിരുന്നുവെന്നാണ് പോലീസിന്റെ അന്വേഷണത്തിൽ കണ്ടെത്തിയത്. കൂടുതൽ പ്രതികൾക്കായി തെരച്ചിൽ തുടരുന്നതായി പോലീസ് അറിയിച്ചു. അന്വേഷണത്തിനായി നാലംഗ സംഘത്തെ നിയോഗിച്ചിട്ടുണ്ട്.
രണ്ടു വർഷങ്ങൾക്കു മുൻപ് വിമലിന്റെ സഹോദരനും ഇതേ രീതിയിൽ കൊല്ലപ്പെട്ടിരുന്നു. ആ കേസിലെ ഏക ദൃക്സാക്ഷിയായിരുന്നു വിമൽ കുമാർ യാദവ്. സാക്ഷിമൊഴി മാറ്റിപ്പറയാൻ വിമൽ കുമാറിന് മേൽ സമ്മർദ്ദമുണ്ടായിരുന്നുവെന്നും റിപ്പോർട്ടുണ്ട്.
