ബെംഗളൂരു:ബിനീഷ് കോടിയേരിക്കെതിരെ കള്ളപ്പണം വെളുപ്പിക്കലുമായി ബന്ധപ്പെട്ട് ഇഡി രജിസ്റ്റര്‍ ചെയ്ത കേസിലെ വിചാരണ നടപടികള്‍ കര്‍ണ്ണാടക ഹൈക്കോടതി സ്റ്റേ ചെയ്തു. കള്ളപ്പണം വെളുപ്പിക്കല്‍ കേസില്‍ നിന്ന് ഒഴിവാക്കണമെന്ന് ആവശ്യപ്പെട്ട് ബെംഗളൂരു സിറ്റി സെഷന്‍സ് കോടതിയെ ബിനീഷ് സമീപിച്ചിരുന്നു. എന്നാല്‍ ഇത് ജൂണ്‍ 16ന് വിചാരണക്കോടതി തള്ളിയിരുന്നു. പിന്നീട് ഇത് ചോദ്യം ചെയ്ത് ബിനീഷ് കര്‍ണ്ണാടക ഹൈക്കോടതിയെ സമീപിക്കുകയായിരുന്നു.
ഇതുമായി ബന്ധപ്പെട്ട് ലഹരിക്കടത്ത് കേസില്‍ ബിനീഷ് കോടിയേരിപ്രതിയല്ലാത്തതിനാല്‍ പ്രഥമദൃഷ്ട്യാ കള്ളപ്പണം വെളുപ്പിക്കല്‍ കേസ് നിലനില്‍ക്കില്ലെന്ന് ഹൈക്കോടതി ജഡ്ജി ജസ്റ്റിസ് ഹേമന്ത് വിലയിരുത്തി. ബിനീഷിനെതിരായ കേസ് സ്റ്റേ ചെയ്തതിനാല്‍ ഹൈക്കോടതി നടപടികള്‍ പൂര്ത്തിയാകുന്നതുവരെ ബിനീഷിന് വിചാരണക്കോടതിയില്‍ ഹാജരാകേണ്ടതില്ല. 2
020 ആഗസ്തില്‍ കൊച്ചി സ്വദേശിയായ മുഹമ്മദ് അനൂപ് തൃശൂര്‍ സ്വദേശി റിജേഷ് രവീന്ദ്രന്‍, കന്നട നടി അനിഖ എന്നിവരെ ലഹരിക്കേസില്‍ നര്‍കോട്ടിക് കണ്‍ട്രോള്‍ ബ്യൂറോ അറസ്റ്റ് ചെയ്തതായിരുന്നു കേസിന്‍റ തുടക്കം. മുഹമ്മദ് അനൂപില്‍ നിന്നും ലഭിച്ച മൊഴിയുടെ അടിസ്ഥാനത്തിലാണ് കള്ളപ്പണക്കേസില്‍ ഇഡി ബിനീഷിനെ അറസ്റ്റ് ചെയ്തത്. ആ കേസില്‍ ബിനീഷ് നാലാം പ്രതിയായിരുന്നു. ഒരു വര്‍ഷത്തോളംകര്‍ണ്ണാടകയിലെ പരപ്പനഹാര ജയിലില്‍ കഴിഞ്ഞ ശേഷമാണ് ബിനീഷ് കൊടിയേരിക്ക് ജാമ്യം ലഭിച്ചത്.
പ്രതികരിക്കാൻ ഇവിടെ എഴുതുക: