മലപ്പുറം: രണ്ടേ കാല് കിലോയോളം വരുന്ന സ്വര്ണമിശ്രിതം ശരീരത്തിനുള്ളിലും അടിവസ്ത്രത്തിലുമായി ഒളിപ്പിച്ച് കടത്താന് ശ്രമിച്ച ദമ്പതിമാര് പിടിയില്. കഴിഞ്ഞ ദിവസം രാത്രി ജിദ്ദയില് നിന്ന് എയര് ഇന്ത്യ എക്സ്പ്രസ് 398 വിമാനത്തില് കരിപ്പൂര് വിമാനത്താവളത്തിലെത്തിയ യുവദമ്പതികളാണ് എയര് കസ്റ്റംസിന്റെ പിടിയിലായത്. ശരീരത്തിനുള്ളിലും അടിവസ്ത്രത്തിനുള്ളിലുമായി ഒളിപ്പിച്ചു കടത്താന് ശ്രമിച്ച ഏകദേശം 1.25 കോടി രൂപ വിലമതിക്കുന്ന 2276 ഗ്രാം സ്വര്ണമിശ്രിതമാണ് പിടികൂടിയത്.
മലപ്പുറം വഴിക്കടവ് മരുത സ്വദേശികളായ അമീര്മോന് പുത്തന് പീടികയില് (35) സഫ്ന പറമ്പനില് (21) എന്നിവരാണ് അറസ്റ്റിലായത്. അമീര്മോന്റെ ശരീരത്തില് നാലു ക്യാപ്സൂളുകളിലായി 1172 ഗ്രാമും സഫ്നയുടെ അടിവസ്ത്രത്തിനുള്ളില് പാക്കറ്റിലാക്കി 1104 ഗ്രാമും സ്വര്ണമിശ്രിതമാണ് ഒളിപ്പിച്ചിരുന്നത്. സഫ്നയെ സംശയം തോന്നി കസ്റ്റംസ് ഉദ്യോഗസ്ഥര് പരിശോധിച്ചപ്പോള് സ്വര്ണമിശ്രിതം അടങ്ങിയ പാക്കറ്റ് ലഭിച്ചു. തുടര്ന്നുണ്ടായ ചോദ്യം ചെയ്യലിലാണ് അമീര്മോന്റെ പേര് വെളിപ്പെടുത്തിയത്.
കള്ളക്കടത്തുസംഘം രണ്ടുപേര്ക്കും 50,000 രൂപ വീതമാണ് പ്രതിഫലമായി വാഗ്ദാനം ചെയ്തിരുന്നതെന്നാണ് കസ്റ്റംസ് ഉദ്യോഗസ്ഥരോട് വ്യക്തമാക്കിയത്. ഈ ദമ്പതികള് തങ്ങളുടെ കുട്ടിയോടൊത്ത് ജിദ്ദയില് നിന്ന് തിരിച്ചു വരുമ്പോഴാണ് കള്ളക്കടത്തിന് ശ്രമിച്ചത്. കുടുംബസമേതം എത്തുന്ന യാത്രക്കാര്ക്ക് നല്കുന്ന സവിശേഷ പരിഗണന ദുരുപയോഗം ചെയ്തു സ്വര്ണം കടത്താനായിരുന്നു ശ്രമം. പിടികൂടിയ സ്വര്ണമിശ്രിതത്തില് നിന്ന് 24 കാരറ്റ് പരിശുദ്ധിയുള്ള 2055 ഗ്രാം സ്വര്ണം വേര്തിരിച്ചെടുത്തു.
