കോഴിക്കോട്: താമരശേരിയില് ഗര്ഭിണിക്ക് ക്രൂരമര്ദനം. ഉണ്ണികുളം സ്വദേശിയായ 19 വയസുകാരിയുടെ ഇരുകാലുകളും കയ്യും ഭർത്താവ് തല്ലിയൊടിച്ചു. ഗുരുതര പരിക്കേറ്റ യുവതി കോഴിക്കോട് മെഡിക്കല് കോളജ് ആശുപത്രിയില് ചികിത്സയിലാണ്. സംഭവത്തിൽ തൃശൂർ സ്വദേശി ബഹാവുദ്ദീൻ അൽത്താഫിനെ താമരശ്ശേരി പോലീസ് അറസ്റ്റ് ചെയ്തു. ഒമ്പത് മാസം മുമ്പാണ് പരാതിക്കാരിയും പ്രതി ബഹാവുദ്ദീനും വിവാഹിതരായത്.
മയക്കുമരുന്നിന് അടിമയായ ഭര്ത്താവ് സ്ത്രീധനം കുറഞ്ഞുപോയെന്നും കൂടുതല് പണം ആവശ്യപ്പെട്ടുമായിരുന്നു മര്ദിച്ചത്. നേരത്തെ, യുവതിയെ ഇയാള് ദേഹോപദ്രവം ഏല്പിച്ചപ്പോള് ഉമ്മയും സഹോദരിയും എത്തി വീട്ടിലേക്ക് കൊണ്ടുപോയിരുന്നു. എന്നാല് പിന്നീട് ഇയാള് ഭീഷണിപ്പെടുത്തി തിരികെ കൊണ്ടുപോവുകയായിരുന്നു. ലോഡ്ജിലെത്തിച്ച മകളോട് സുഹൃത്തിന്റെ കൂടെ കഴിയാന് ആവശ്യപ്പെട്ടെന്നും ഇത് എതിര്ത്തപ്പോള് മര്ദിക്കുകയായിരുന്നെന്നും യുവതിയുടെ ഉമ്മ ആരോപിച്ചു.
മകളെ ഇയാള് മര്ദിക്കുന്നത് പതിവായിരുന്നു. ഭര്ത്താവിന്റെ അമ്മയും മകളെ മാനസികമായി പീഡിപ്പിക്കാറുണ്ടെന്നും കുടുംബം പ്രതികരിച്ചു. ബഹാവുദ്ദീൻ നിരവധി ക്രിമിനൽ കേസുകളിൽ പ്രതിയാണെന്നും താമരശ്ശേരി പൊലീസ് പറഞ്ഞു.
