തിരുവനന്തപുരം: പുനലൂര് താലൂക്ക് ആശുപത്രിയില് ഇന്ജക്ഷന് നല്കിയതിനെ തുടര്ന്ന് 11 രോഗികള്ക്ക് പാര്ശ്വഫലം ഉണ്ടായ സംഭവത്തില് 2 ആശുപത്രി ജീവനക്കാര്ക്കെതിരെ നടപടി. നഴ്സിംഗ് ഓഫീസറേയും ഗ്രേഡ്2 അറ്റന്ഡറെയും സസ്പെന്ഡ് ചെയ്തു.
കൊല്ലം ജില്ലാ മെഡിക്കല് ഓഫീസറുടെ അന്വേഷണത്തെത്തുടര്ന്നാണ് സസ്പെന്ഷന്. സംഭവം ശ്രദ്ധയില്പ്പെട്ടതിനെ തുടര്ന്ന് ആരോഗ്യ വകുപ്പ് മന്ത്രി വീണാ ജോര്ജ് അന്വേഷണം നടത്താന് ആരോഗ്യ വകുപ്പ് ഡയറക്ടര്ക്ക് നിര്ദേശം നല്കിയിരുന്നു. തുടര്ന്ന് കൊല്ലം ഡി.എം.ഒ. നടത്തിയ അന്വേഷണത്തെ തുടര്ന്നാണ് നടപടി.
ഇന്നലെ രാത്രി ഒമ്പത് മണിയോടെ പുനലൂര് താലൂക്ക് ആശുപത്രിയില് നിന്നും കുത്തിവെപ്പ് എടുത്തതിന് പിന്നാലെ 11 രോഗികള്ക്കാണ് ശാരീരിക അസ്വസ്ഥത അനുഭവപ്പെട്ടത്. ഇവരില് മൂന്ന് കുട്ടികളെ തിരുവനന്തപുരം എസ്എടി ആശുപത്രിയില് പ്രവേശിപ്പിച്ചു. എട്ട് പേരെ പുനലൂര് താലൂക്ക് ആശുപത്രിയിലെ അത്യാഹിത വിഭാഗത്തിലേക്ക് മാറ്റി. വിറയലും ശരീരം തളരുന്നത് പോലെയും തോന്നിയതോടെ എല്ലാവരെയും ഐസിയുവിലേക്ക് മാറ്റുകയായിരുന്നു. മൂന്ന് കുട്ടികളെ തിരുവനന്തപുരം എസ്എടി ആശുപത്രിയിലേക്കും മാറ്റിയിരുന്നു.
