ചെന്നൈ: റേഷന് കടകളില് തമിഴ്നാട് മുഖ്യമന്ത്രി എം.കെ. സ്റ്റാലിന്റെ ഫോട്ടോ വയ്ക്കുന്നതിനെ പരിഹസിച്ച് ബിജെപി അധ്യക്ഷന് കെ. അണ്ണാമലൈ. റേഷന് കടകളില് മാത്രമല്ല, സര്ക്കാരിന്റെ ഉടമസ്ഥതയിലുള്ള മദ്യ കടകളിലും സ്റ്റാലിന്റെ ഫോട്ടോ വയ്ക്കണമെന്നും അണ്ണാമലൈ പരിഹസിച്ചു.
കേന്ദ്ര സര്ക്കാര് പദ്ധതികളിലെല്ലാം ഡിഎംകെ സര്ക്കാരിന്റെ സിറ്റിക്കര് പതിപ്പിച്ചിരിക്കുകയാണെന്നും അദ്ദേഹം പറഞ്ഞു. അണ്ണാമലൈയുടെ എന് മണ്ണ്, എന് മക്കള് യാത്ര മധുര മേലൂരിലെ ഗവണ്മെന്റ് ആര്ട്സ് കോളജിന് മുന്നില് നിന്നാണ് ഇന്നലെ ആരംഭിച്ചത്. ജെല്ലിക്കെട്ട് കാളകളോടെയും കരകാട്ടത്തോടെയുമാണ് ബിജെപി പ്രവര്ത്തകര് അണ്ണാമലൈയെ സ്വീകരിച്ചത്.
ഇതിനിടയില് ജെല്ലിക്കെട്ട് കാളകളില് ഒന്ന് അണ്ണാമലയുടെ നേരെ കുതിച്ച് ചാടിയത് പരിഭ്രാന്തി പടര്ത്തി. എന്നാല് ആര്ക്കും അപകടം സംഭവിച്ചില്ല. കാളയെ പിടിച്ചുകെട്ടിയ ശേഷം അണ്ണാമലൈ കാളയെ തലോടി ശാന്തനാക്കുന്ന ദൃശ്യങ്ങള് സോഷ്യല് മീഡിയയില് വൈറലായിട്ടുണ്ട്.
