കൊല്ലം: വിദേശ വനിതയെ മദ്യം നല്കി പീഡിപ്പിച്ച യുവാക്കള് പോലീസ് പിടിയില്. ആലുംകടവ് ചെറിയഴീക്കല് പന്നിശ്ശേരില് നിഖില് (28), ചെറിയഴീക്കല് അരശ്ശേരില് ജയന്(39) എന്നിവരാണ് കരുനാഗപ്പള്ളി പോലീസിന്റെ പിടിയിലായത്. വള്ളിക്കാവ് ബീച്ചില് ഇരിക്കുകയായിരുന്ന അമേരിക്കന് വനിതയെ ആണ് പ്രതികള് പീഡനത്തിന് ഇരയാക്കിയത്.
തിങ്കളാഴ്ച രാവിലെ ബീച്ചില് ഇരിക്കുകയായിരുന്ന സ്ത്രീയോട് സൗഹൃദം സ്ഥാപിച്ച ശേഷം മദ്യം നല്കിയ ശേഷം ബൈക്കില് കയറ്റി ആളൊഴിഞ്ഞ വീട്ടിലെത്തിച്ച് ലൈംഗികമായി പീഡിപ്പിക്കുകയായിരുന്നു. ഒപ്പമുള്ളവര് വിവരം അറിഞ്ഞതോടെ ഇവരെ ആശുപത്രിയില് പ്രവേശിപ്പിക്കുകയും കരുനാഗപ്പള്ളി പോലീസ് സ്റ്റേഷനില് പരാതി നല്കുകയും ചെയ്തു.
ജില്ലാ പോലീസ് മേധാവി മെറിന് ജോസഫിന്റെ നിര്ദേശപ്രകാരം കരുനാഗപ്പള്ളി എസിപി പ്രദീപ് കുമാറിന്റെ മേല്നോട്ടത്തില് പോലീസ് നടത്തിയ അന്വേഷണത്തില് മണിക്കൂറുകള്ക്കുള്ളില് തന്നെ പ്രതികളെ ഇരുവരേയും കണ്ടെത്തി അറസ്റ്റ് ചെയ്തു. അറസ്റ്റിലായ നിഖില് നിരവധി ക്രമിനല് കേസുകളിലെ പ്രതിയാണ്.
