തിരുവല്ലം: തിരുവല്ലത്ത് സ്കൂട്ടർ യാത്രികന്റെ തലയിലൂടെ ടിപ്പർ കയറിറങ്ങി യുവാവിന് ദാരുണാന്ത്യം. വെഞ്ഞാറമൂട്‌ മുണ്ടയിൽ തടത്തരിക്കത്ത് വീട്ടിൽ കൂനൻ വേങ്ങയിൽ എം.പി.അബ്ദുൾ സലീമിന്റെയും എ.സമീന ബിവീ യുടെയും മകൻ എ മുഹമ്മദ് ഇക്ബാൽ (23)ആണ് മരിച്ചത്. തൈക്കാട് ആരോഗ്യവകുപ്പ് ട്രെയിനിംഗ് സെന്ററിലെ ജീവനക്കാരനാണ്.
വ്യാഴാഴ്‌ച്ച വൈകിട്ട് 5.30 ന് തിരുവല്ലം പാലത്തിന് താഴെയുള്ള കരിമ്പുവിളയിലാണ് അപകടം.ഇന്ന് മുഹറം അവധിയായതിനാൽ ജോലി കഴിഞ്ഞ് പാച്ചല്ലൂരിലുള്ള സഹോദരിയുടെ വീട്ടിലേയ്‌ക്ക് പോകവെയാണ് അപകടം.അമ്പലത്തറ കുമരിചന്ത ഭാഗത്ത് നിന്ന് തിരുവല്ലത്തേയ്‌ക്ക് വരുകയായിരുന്ന സ്‌കൂട്ടറും ടിപ്പറും കരിമ്പുവിള ഭാഗത്ത് എത്തിയതോടെ ടിപ്പറിന്റെ മുൻ ഭാഗമിടിച്ച് സ്കൂട്ടർ യാത്രികൻ സ്‌കൂട്ടറോടെ റോഡിലേക്ക് തെറിച്ച് വീഴുകയായിരുന്നു. ഇടിയുടെ ആഘാതത്തിൽ സ്‌കൂട്ടറുമായി അൽപ്പദൂരം നിരങ്ങി നീങ്ങുകയും ലോറിയുടെ പിന്നിലുളള ടയർ യുവാവിന്റെ തലയിലൂടെ കയറിയിറങ്ങി തൽക്ഷണം മരിച്ചു.. അപകടത്തെ തുടർന്ന് കുമരിചന്ത ബൈപ്പാസ് മുതൽ തിരുവല്ലം ബൈപ്പാസിലെ രണ്ട് പാലങ്ങളിലും അരമണിക്കൂറോളം ഗതാഗത കുരുക്ക് അനുഭവപ്പെട്ടു. പൂന്തൂറ എസ്ഐ.വി. സുനിൽകുമാറിന്റെ നേത്യത്വത്തിലുളള പോലീസ് സംഘം സ്ഥലത്തെത്തി.മൃതദേഹം108 ആംബുലൻസ് എത്തിച്ച് മെഡിക്കൽ കോളേജ് മോർച്ചറിയിലേക്ക് മാറ്റി. പൂന്തുറ പോലീസ് കേസെടുത്തു. സഹോദരങ്ങൾ: സോലിക്, ഫർസാന
