തൊടുപുഴ : പത്തനംതിട്ട കലഞ്ഞൂര്പാടം സ്വദേശി നൗഷാദിന്റെ തിരോധാന കേസ് അന്വേഷണത്തിനിടെ ഇയാളെ ജീവനോടെ കണ്ടെത്തി. നൗഷാദിനെ കൊലപ്പെടുത്തിയെന്ന ഭാര്യ അഫ്സാനയുടെ മൊഴിയുടെ അടിസ്ഥാനത്തില് ഇയാളുടെ മൃതദേഹം കണ്ടെടുക്കുന്നതിനായി തെരച്ചില് നടത്തി വരികയായിരുന്നു. അതിനിടെയാണ് നൗഷാദിനെ ജീവനോടെ കണ്ടെത്തിയിരിക്കുന്നത്.
തൊമ്മന്കുത്ത് ഭാഗത്തു നിന്നുമാണ് നൗഷാദിനെ കണ്ടെത്തിയിരിക്കുന്നത്. ഇയാളെ തൊടുപുഴ ഡിവൈഎസ്പി ഓഫീസില് എത്തിച്ചിട്ടുണ്ട്. നൗഷാദ് കുഴിമറ്റത്തെ റബര് തോട്ടത്തില് ജോലി ചെയ്ത് വരികയായിരുന്നു. ഭാര്യയുമായുള്ള പ്രശ്നങ്ങളെ തുടര്ന്നാണ് താന് അവിടെ നിന്നും മാറി നിന്നത്. ഭാര്യ വിളിച്ചുകൊണ്ടുവന്നവര് തന്നെ മര്ദ്ദിച്ചിട്ടുണ്ട്. വീട്ടിലേക്ക് തിരിച്ചുപോകാന് പേടിയുണ്ട്. രണ്ട് വര്ഷം മുമ്പാണ് വീട് വിട്ടത്. ഭയം മൂലമാണ് ഇതുവരെ മാറി നിന്നത്. തന്നെ കൊലപ്പെടുത്തിയെന്ന് ഭാര്യ മൊഴി നല്കിയത് എന്തുകൊണ്ടാണെന്ന് അറിയില്ലെന്നും നൗഷാദ്. നൗഷാദിനെ പത്തനംതിട്ട പോലീസിന് കൈമാറും.
നൗഷാദ് തിരിച്ചെത്തിയതോടെ അഫ്സാന പോലീസിന് നല്കിയ മൊഴികളെല്ലാം കളവാണെന്നാണെന്ന് തെളിഞ്ഞിരിക്കുകയാണ്. മാത്രമല്ല ഇവര് പരസ്പര വിരുദ്ധമായാണ് പെരുമാറിയിരുന്നത്. ഇവരുടെ മൊഴിയുടെ അടിസ്ഥാനത്തില് പോലീസ് ബുധനാഴ്ച പരുത്തിപ്പാറയിലെ വീട് ഉള്പ്പെടുന്ന പ്രദേശത്തായി മൃതദേഹത്തിനായി പരിശോധനയും നടത്തിയിരുന്നു.
2021 നവംബറിലാണ് നൗഷാദിനെ കാണാനില്ലെന്ന് പിതാവ് പോലീസില് പരാതി നല്കുന്നത്. അന്ന് അന്വേഷണം നടന്നെങ്കിലും കാര്യമായ പുരോഗതി ഉണ്ടായില്ല. ആറ് മാസം മുന്പ് ഭാര്യ അഫ്സാനയുടെ മൊഴി പോലീസ് രേഖപ്പെടുത്തിയിരുന്നു. അഫ്സാനയുടെ മൊഴിയില് സംശയം തോന്നിയ പോലീസ് ഇവരെ കൂടുതല് ചോദ്യം ചെയ്യുകയായിരുന്നു. ചോദ്യം ചെയ്യലില് ഒന്നരവര്ഷം മുമ്പ് പറക്കോട് പരുത്തിപ്പാറയില് വാടകയ്ക്ക് താമസിക്കുമ്പോള് നൗഷാദിനെ തലക്കടിച്ച് കൊന്നു. വീട്ടുവഴക്കിനെ തുടര്ന്നായിരുന്നു കൊലപാതകം എന്നായിരുന്നു അഫ്സാന പോലീസിനെ അറിയിച്ചത്.
ഭര്ത്താവിനെ കൊലപ്പെടുത്തിയെന്ന മൊഴിയുടെ അടിസ്ഥാനത്തില് കഴിഞ്ഞ ദിവസം അഫ്സാനയുടെ അറസ്റ്റ് രേഖപ്പെടുത്തിയിരുന്നു. എന്നാല് പരസ്പര വിരുദ്ധമായി മൊഴി നല്കുന്നിയത് പോലീസിനെ പ്രതിസന്ധിയിലാക്കിയിരുന്നു. ഇവര്ക്കെതിരെ തെളിവ് നശിപ്പിക്കല്, പോലീസിനെ കബളിപ്പിക്കല് തുടങ്ങിയ വകുപ്പുകള് ചുമത്തി രജിസ്റ്റര് ചെയ്ത കേസിലാണ് നിലവില് അഫ്സാനയെ അറസ്റ്റ് ചെയ്തിരിക്കുന്നത്. എന്നാല് നൗഷാദ് ജീവനോടെ ഉണ്ടെന്നാണ് പോലീസ് ഇപ്പോള് സംശയിക്കുന്നത്.
