വടക്കഞ്ചേരി: ഭാര്യയെ പെട്രോള് ഒഴിച്ച് തീകൊളുത്തി കൊലപ്പെടുത്താന് ശ്രമം. ഭാര്യക്കും ഭര്ത്താവിനും പരിക്ക്. മഞ്ഞപ്ര സ്വദേശിനി കാര്ത്തിക (30) ഭര്ത്താവ് പല്ലശ്ശന സ്വദേശി പ്രമോദ് (36) എന്നിവര്ക്കാണ് പരിക്കേറ്റത്. ഗുരുതരമായി പരിക്കേറ്റ പ്രമോദിനെ തൃശൂര് മെഡിക്കല് കോളേജ് ആശുപത്രിയിലും കാര്ത്തികയെ ആലത്തുര് താലൂക്ക് ആശുപത്രിയിലും പ്രവേശിപ്പിച്ചു.
ഇന്നലെ രാവിലെ ആറരയോടെ മഞ്ഞപ്ര നാട്ടുകല് ബസ് സ്റ്റോപ്പിന് സമീപമാണ് സംഭവം. മൂന്ന് വര്ഷത്തോളമായി ഇരുവരും അകന്നുകഴിയുകയായിരുന്നു. പാലക്കാട് ബേക്കറിയില് ജോലി ചെയ്യുന്ന കാര്ത്തിക രാവിലെ ബസ് കയറാനായി വന്നപ്പോള് സമീപത്തായി ഒളിഞ്ഞിരുന്ന പ്രമോദ് കൈയില് കരുതിയ പെട്രോള് കുപ്പിയുമായി ആക്രമിക്കുകയായിരുന്നു. തുടര്ന്ന് കാര്ത്തികയെ കെട്ടിപ്പിടിച്ച് ഇരുവരുടെയും ശരീരത്ത് പെട്രോള് ഒഴിച്ച് തീകൊളുത്തി. പെട്രാള് കുപ്പി തട്ടി മാറ്റിയ കാര്ത്തികയ്ക്ക് കാര്യമായി പരിക്കേറ്റില്ല. ഈ സമയം ഇവരുടെ എട്ടും അഞ്ചും വയസുള്ള മക്കളും കാര്ത്തികയോടൊപ്പം ഉണ്ടായിരുന്നെങ്കിലും ബഹളം കേട്ട് വീട്ടിലേക്ക് ഓടിയതിനാല് പരിക്കേല്ക്കാതെ രക്ഷപ്പെട്ടു. ഒരു വര്ഷം മുമ്പും പ്രമോദ് കാര്ത്തികയെ കുത്തി പരിക്കേല്പിച്ചിരുന്നു. 60 ശതമാനത്തോളം പൊള്ളലേറ്റ പ്രമോദിന്റെ നില ഗുരുതരമായി തുടരുകയാണ്. വടക്കഞ്ചേരി പോലീസ് സ്ഥലത്തെത്തി കേസെടുത്തു.
ആലത്തൂര് ഡിവൈഎസ്പി: ആര്. അശോകന്, എസ്ഐമാരായ ജീഷ് മോന് വര്ഗീസ്, കെ. ബാബു എന്നിവര് സംഭവസ്ഥലം സന്ദര്ശിച്ചു.
