മുംബൈ : സീരിയല് ചിത്രീകരണത്തിനിടെ ഷൂട്ടിങ് സെറ്റില് പുലിയിറങ്ങി. മുംബൈ ഗോരേഗാവിലെ ഫിലിം സിറ്റിയില് മറാത്തി സീരിയലിന്റെ ചിത്രീകരണത്തിനിടെയാണ് പുലിയും കുട്ടിയും ഇറങ്ങിയത്. 200-ലധികം ആളുകള് സെറ്റിലുണ്ടായിരുന്നതായാണ് വിവരം. പുലിയും കുട്ടിയും ഫിലിം സിറ്റിയിലൂടെ സഞ്ചരിക്കുന്നതിന്റെ വീഡിയോകള് സമൂഹ മാധ്യമങ്ങളില് വൈറലായി കഴിഞ്ഞു.
ഫിലിം സിറ്റിയില് പുലിയുള്പ്പടെയുള്ള വന്യമൃഗങ്ങളിറങ്ങുന്നത് പതിവാണ്. പത്ത് ദിവസത്തിനിടെ ഇത് നാലാം തവണയാണ് പുലിയിറങ്ങുന്നത്. മതിയായ സുരക്ഷാക്രമീകരണങ്ങള് സര്ക്കാര് ഒരുക്കി നല്കണമെന്ന് ഓള് ഇന്ത്യന് സിനി വര്ക്കേഴ്സ് അസോസിയേഷന് പ്രസിഡന്റ് സുരേഷ് ശ്യാമള ഗുപ്ത പറഞ്ഞു. സംഭവത്തില് നൂറോളം ജീവനക്കാര് സമരത്തിലാണെന്നും ചിത്രീകരണം താത്കാലികമായി നിര്ത്തിവെച്ചിരിക്കുകയാണെന്നും സുരേഷ് പറഞ്ഞു.
കുറച്ചു ദിവസങ്ങള്ക്ക് മുമ്പും സെറ്റില് കയറിയ പുലി തെരുവ് നായയെ ആക്രമിച്ചിരുന്നു. അതേസമയം ഫിലിം സിറ്റിയിലും കോളനിയിലും പുലിയുടെ സാന്നിധ്യമുള്ളതായി സഞ്ജയ് ഗാന്ധി നാഷണല് പാര്ക്ക് വൈല്ഡ് ലൈഫ് വാര്ഡന് പവന് ശര്മ പറഞ്ഞു. ജനവാസ കേന്ദ്രങ്ങളില് പുലി ഇറങ്ങുന്നത് തടയാന് നടപടി സ്വീകരിച്ചു വരികയാണെന്നും അദ്ദേഹം പറഞ്ഞു.
