ടോക്ക്യോ: ഇന്ത്യയുടെ ലക്ഷ്യ സെന്‍ ഇന്ന് ടോക്കിയോയില്‍ നടക്കുന്ന ജപ്പാന്‍ ഓപ്പണ്‍ ബാഡ്മിന്റണ്‍ ടൂര്‍ണമെന്റിന്റെ പ്രീ-ക്വാര്‍ട്ടറിലേക്ക് മുന്നേറി. നാട്ടുകാരനായ പ്രിയാന്‍ഷു രജാവത്തിനെ 21-15, 12-21, 24-22 എന്ന സ്‌കോറിനാണ് തോല്‍പ്പിച്ചത്.
എന്നാല്‍ ചൈനയുടെ വെങ് ഹോങ്യാങ്ങിനോട് 21-13, 24-22, 21-18 എന്ന സ്‌കോറിന് തോറ്റ മിഥുന്‍ മഞ്ജുനാഥ് ടൂര്‍ണമെന്റില്‍ നിന്ന് പുറത്തായി.
അതേസമയം,പുരുഷ ഡബിള്‍സ് ജോഡികളായ സാത്വിക്സായിരാജ് രങ്കിറെഡ്ഡി-ചിരാഗ് ഷെട്ടി സഖ്യവും മുന്നേറി. 21-16, 11-21, 21-13 എന്ന സ്‌കോറിനാണ് ഇന്തോനേഷ്യന്‍ ജോഡികളായ ലിയോ റോളി കര്‍ണാണ്ടോ-ഡാനിയല്‍ മാര്‍ട്ടിന്‍ സഖ്യത്തെ പരാജയപ്പെടുത്തിയത്. വനിതാ സിംഗിള്‍സ് വിഭാഗത്തില്‍ ഇന്ത്യന്‍ താരം പിവി സിന്ധുവും ചൈനയുടെ ഷാങ് യിമാനും തമ്മിലുള്ള മത്സരം ഇന്നാണ്.
നേരത്തെ കിഡംബി ശ്രീകാന്ത്, എച്ച്എസ് പ്രണോയ് എന്നിവരും രണ്ടാം റൗണ്ടില്‍ പ്രവേശിച്ചു. ആദ്യ റൗണ്ട് മത്സരത്തില്‍ തായ്വാന്‍ താരം ചൗ ടിയെന്‍ ചെനിനെതിരെ ശ്രീകാന്ത് വിജയിച്ചപ്പോള്‍, ലോക അഞ്ചാം നമ്പര്‍ താരം ചൈനയുടെ ലി ഷിഫെംഗിനെയാണ് പ്രണോയ് പരാജയപ്പെടുത്തിയത്.
ഇന്ത്യയുടെ മുന്‍നിര വനിതാ ജോഡികളായ ഗായത്രി ഗോപിചന്ദും ട്രീസ ജോളിയും നാട്ടുകാരായ യുയി സുയിസു, സയാക ഹൊബാര എന്നിവരെ പരാജയപ്പെടുത്തി രണ്ടാം റൗണ്ടില്‍ പ്രവേശിച്ചു. എന്നാല്‍, വനിതാ സിംഗിള്‍സില്‍ ആകര്‍ഷി കശ്യപ് ജപ്പാന്റെ അകാനെ യമാഗുച്ചിയോട് പരാജയപ്പെട്ടു. മിക്സഡ് ഡബിള്‍സില്‍ സിക്കി റെഡ്ഡി-രോഹന്‍ കപൂര്‍ സഖ്യവും ആദ്യ റൗണ്ടില്‍ തന്നെ പുറത്തായി.
പ്രതികരിക്കാൻ ഇവിടെ എഴുതുക: