അയര്‍ലന്‍ഡ് ഗോള്‍ നേടിയെന്നുറപ്പിച്ച ഷോട്ട് സേവ് ചെയ്ത് ഓസ്‌ട്രേലിയന്‍ ഗോള്‍ കീപ്പര്‍ മക്കെന്‍സി അര്‍ണോള്‍ഡ് ആണ് ടീമിന്റെ വിജയം നിലനിര്‍ത്തിയത്. ഇന്‍ജുറി ടൈമിലേക്ക് കടന്ന നിമിഷം അയര്‍ലന്‍ഡില്‍ നിന്നും ഗോളിലേക്ക് വന്ന പന്തിനെ ഉയര്‍ന്നു ചാടി മക്കെന്‍സി രക്ഷകയായുകകയായിരുന്നു. ഇത് ഗോളായിരുന്നെങ്കില്‍ കളി സമനിലയിലാകുമായിരുന്നു. രണ്ടാം പകുതിയുടെ തുടക്കത്തില്‍ നേടിയ ഒരു ഗോളിന്റെ മുന്‍തൂക്കമേ ഓസ്‌ട്രേലിയക്ക് ഉണ്ടായിരുന്നുള്ളു.
ഗോള്‍ രഹിതമായിരുന്നു ഓസ്‌ട്രേലിയയും അയര്‍ലന്‍ഡും തമ്മില്‍ നടന്ന മത്സരത്തിന്റെ ആദ്യപകുതി. രണ്ടാം പകുതി തുടങ്ങി 51-ാം മിനിറ്റില്‍ ഓസ്‌ട്രേലിയന്‍ താരം കൂണിയില്‍ നിന്നും ലഭിച്ച പാസുമായി ഹെയ്‌ലി റാസോ അയര്‍ലന്‍ഡ് ഗോള്‍ മുഖത്തേക്ക് മുന്നേറി. താരത്തെ ബോക്‌സിനകത്ത് തടയാന്‍ ശ്രമിച്ച മാറിസ്സ ഷേവയ്‌ക്ക് പിഴവ് പറ്റി. വിസിലടിച്ച റഫറി സ്‌പോട്ട് കിക്ക് പോയിന്റിലേക്ക് വിരല്‍ ചൂണ്ടി. കിക്കെടുത്ത സ്‌റ്റെഫാനി കാറ്റ്‌ലി പന്ത് ലക്ഷ്യത്തിലെത്തിച്ചു. ഓസ്ട്രേലിയ വിജയഗോള്‍ നേടി. മത്സരത്തില്‍ ശരിക്കും താരമായത് ഗോള്‍ കീപ്പര്‍ മക്കന്‍സി അര്‍ണോള്‍ഡ് തന്നെ. ഇന്‍ജുറി ടൈമിലെ നിര്‍ണായക സേവിന് മുമ്പ് 77-ാം മിനിറ്റിലും താരത്തിന്റെ അത്യുഗ്രന്‍ സേവ് കണ്ടിരുന്നു.
പ്രതികരിക്കാൻ ഇവിടെ എഴുതുക: