കൊച്ചി : പോലീസ് കസ്റ്റഡിയിലെടുത്ത കെഎസ്‌യു പ്രവര്‍ത്തകരെ കോണ്‍ഗ്രസ് നേതാക്കള്‍ സ്‌റ്റേഷനില്‍ നിന്നും വിളിച്ചിറക്കി. വിദ്യാര്‍ത്ഥികളുടെ സംഘര്‍ഷവുമായി ബന്ധപ്പെട്ട് പോലീസ് കസ്റ്റയിലെടുത്ത കെഎസ് യു പ്രവര്‍ത്തകരെ ബെന്നി ബഹനാന്‍ എംപിയും എംഎല്‍എമാരായ റോജി എം ജോണും സനീഷ് ജോസഫും ചേര്‍ന്നാണ് മോചിപ്പിച്ചത്.
കാലടി ശ്രീശങ്കര കോളേജിലെ 7 വിദ്യാര്‍ത്ഥികളെ പുലര്‍ച്ചെയാണ് പോലീസ് കസ്റ്റഡിയില്‍ എടുത്തത്. ഇവരില്‍ രണ്ട് പേരെ പോലീസി വീട്ടില്‍ നിന്നാണ് കസ്റ്റഡിയില്‍ എടുത്തത്. ഇതില്‍ പ്രതിഷേധിച്ച് കോണ്‍ഗ്രസ് നേതാക്കള്‍ പോലീസ് സ്‌റ്റേഷന് മുന്നില്‍ കുത്തിയിരുന്നു പ്രതിഷേധിക്കുകയും അതിനിടെ റോജി ജോണ്‍ എംഎല്‍എ ലോക്കപ്പില്‍ നിന്ന് വിദ്യാര്‍ത്ഥികളെ പുറത്തിറക്കുകയുമായിരുന്നു.
വിദ്യാര്‍ത്ഥികളെ കുറ്റവാളികളെപ്പോലെയാണ് പോലീസ് അറസ്റ്റ് ചെയ്ത് വീട്ടില്‍ നിന്നും വിളിച്ചിറക്കിയത്. അറസ്റ്റ് ചെയ്ത് കയ്യാമം വെച്ച് ഇവരുടെ കണ്ണ്‌കെട്ടിയാണ് പോലീസ് സ്റ്റേഷനിലേക്ക് എത്തിച്ചതെന്ന് ബെന്നി ബെഹ്നാന്‍ എംപി പറഞ്ഞു. അതിനിടെ വിദ്യാര്‍ത്ഥികളെ റോജി ജോണ്‍ എംഎല്‍എ സെല്ലില്‍ നിന്നും മോചിപ്പിക്കുന്നതിന്റെ ദൃശ്യങ്ങളും പുറത്തുവന്നിട്ടുണ്ട്. വിദ്യാര്‍ത്ഥികളെ പുറത്തിറക്കിയതില്‍ തെറ്റില്ലെന്നും എംഎല്‍എ മാധ്യമങ്ങളോട് പ്രതികരിച്ചു.
പ്രതികരിക്കാൻ ഇവിടെ എഴുതുക: