കാഞ്ഞാണി: പ്രായപൂര്‍ത്തിയാകാത്ത പത്താം ക്ലാസ് വിദ്യാര്‍ത്ഥിക്ക് മദ്യം വില്‍പന നടത്തിയ ബാര്‍ ജീവനക്കാരനെ അന്തിക്കാട് പോലീസ് അറസ്റ്റ് ചെയ്തു. കാഞ്ഞാണി സില്‍വര്‍ റസിഡന്‍സി ബാറിലെ ജീവനക്കാരന്‍ ഷൈജുവിനെയാണ് അന്തിക്കാട് ഇന്‍സ്‌പെക്ടര്‍ പി.കെ. ദാസ് അറസ്റ്റ് ചെയ്തത്.
വിദ്യാര്‍ത്ഥിയെ മദ്യം കഴിച്ച നിലയില്‍ കണ്ടത്തിയതിനെ തുടര്‍ന്ന് രക്ഷിതാക്കളുടെ പരാതിയിലാണ് അറസ്റ്റ്. കാഞ്ഞാണിയിലെ സില്‍വര്‍ ബാറില്‍ മദ്യം ആവശ്യപ്പെട്ട് എത്തിയ പത്താം ക്‌ളാസുകാരനായ വിദ്യാര്‍ത്ഥിക്ക് ലോക്കല്‍ കൗണ്ടറില്‍ ബാര്‍ ജീവനക്കാരന്‍ മദ്യം വിറ്റു. പാഴ്സലായാണ് മദ്യം കൊടുത്തുവിട്ടത്. അബ്കാരി നിയമപ്രകാരവും, ജെ.ജെ. ആക്ട് പ്രകാരവുമാണ് ബാര്‍ ജീവനക്കാരനെതിരെ കേസ് എടുത്തത്. വീട്ടില്‍ നിന്നും പോയ വിദ്യാര്‍ത്ഥിയെ സമയം കഴിഞ്ഞിട്ടും കാണാതായതിനെ തുടര്‍ന്ന് നടത്തിയ അന്വേഷണത്തില്‍ മദ്യപിച്ച് അവശനിലയില്‍ കണ്ടെത്തുകയായിരുന്നു. തുടര്‍ന്ന് രക്ഷിതാക്കള്‍ അന്തിക്കാട് പോലീസില്‍ പരാതി നല്‍കി.
മദ്യം വിറ്റ ബാറിലെത്തി കണ്ടശാംകടവ് കാരമുക്ക് സ്വദേശി കടയില്‍ വീട്ടില്‍ ഷൈജു (52) വിനെ പോലീസ് കസ്റ്റഡിയില്‍ എടുത്തു. അന്തിക്കാട് ഇന്‍സ്‌പെക്ടര്‍ പി.കെ. ദാസ്, എഎസ്ഐ എം.കെ. അസീസ്, സിപിഒ സുര്‍ജിത്ത് എന്നിവരടങ്ങിയ സംഘമാണ് പ്രതിയെ പിടികൂടിയത്.
പ്രതികരിക്കാൻ ഇവിടെ എഴുതുക: