വെളിയനാട്: വെള്ളപ്പൊക്കത്തില് ഒരുനാട് മൊത്തം വെള്ളത്തില് മുങ്ങി ദുരിതം അനുഭവിക്കുമ്പോള് ദുരിതാശ്വാസ ക്യാമ്പ് പോലും തുടങ്ങാനാവാതെ ഒരുകൂട്ടം ജനങ്ങള്. വെളിയനാട് ഗ്രാമപഞ്ചായത്ത് രണ്ടാം വാര്ഡിലെ കുരിതിക്കളം പ്രദേശത്തെ ജനങ്ങളാണ് ദുരിതം അനുഭവിക്കുന്നത്. വെളിയനാട് പഞ്ചായത്തിലെ ഒരു ജീവനക്കാരന്റെ അലംഭാവം മൂലമാണ് ക്യാമ്പ് തുടങ്ങാന് സാധിക്കാത്തതെന്ന് നാട്ടുകാര് പറഞ്ഞു.
പഞ്ചായത്തിലെ മറ്റെല്ലാ പ്രദേശങ്ങളിലും ദുരിതാശ്വാസ ക്യാമ്പുകള് ഇതിനോടകം ആരംഭിച്ചിട്ടുണ്ട്. ഏറ്റവും അവസാന നിമിഷമാണ് രണ്ടാം വാര്ഡില് ക്യാമ്പ് ആരംഭിക്കാന് പഞ്ചായത്തിലെ ജീവനക്കാരന് അനുമതി നല്കിയത്. ക്യാമ്പിലേക്ക് ആവശ്യമായ അരി അടക്കമുള്ളവ സപ്ലൈകോയില് നിന്ന് വാങ്ങാന് സാധിച്ചിട്ടില്ലെന്നും നാട്ടുകാര് പറഞ്ഞു. അടുത്തദിവസവും ക്യാമ്പ് ആരംഭിക്കാന് സാധിക്കുമോ എന്ന ആശങ്കയിലാണ് ജനങ്ങള്.
