തിരുവനന്തപുരം:ആചാരങ്ങളുടെയും വിശ്വാസങ്ങളുടെയും മേല്‍ കൈവെയ്‌ക്കാന്‍ പിണറായി സര്‍ക്കാരിന് പേടി. ഇത് മൂലം ഇലന്തൂര്‍ നരബലിയ്‌ക്ക് പിന്നാലെ ആഭിചാരങ്ങളും ദുർമന്ത്രവാദവും തടയാനുദ്ദേശിച്ച് പിണറായി സര്‍ക്കാര്‍ തയ്യാറാക്കിയ കരട് ബിൽ തല്‍ക്കാലത്തേയ്‌ക്ക് പിൻവലിച്ചു ഇതിന്റെ പേരില്‍ പുതിയൊരു പുലിവാല്‍ കൂടി പിടിക്കേണ്ടെന്നാണ് ഇക്കാര്യത്തില്‍ സര്‍ക്കാരിന്റെ നിലപാട്. കഴിഞ്ഞ മന്ത്രിസഭായോഗത്തിൽ മുഖ്യമന്ത്രിയുടെ നിർദേശപ്രകാരമാണ് ബിൽ പിൻവലിച്ചത്.
അന്ധവിശ്വാസങ്ങളേത് മതാചാരങ്ങളേത് എന്നിങ്ങനെ അതിര്‍വരമ്പ് ഇടാന്‍ പറ്റാത്തതാണ് പ്രശ്നമായത്. മാത്രമല്ല, കമ്മ്യൂണിസ്റ്റ് സര്‍ക്കാര്‍ ജനങ്ങളുടെ വിശ്വാസത്തിന്റെ കടയ്‌ക്കല്‍ കത്തിവെയ്‌ക്കാന്‍ ശ്രമിക്കുന്നു എന്ന് ശക്തമായ പരാതികള്‍ ഉയര്‍ന്നിരുന്നു. ജസ്റ്റിസ് കെ ടി തോമസ് അധ്യക്ഷനായ നിയമപരിഷ്കരണ കമ്മീഷൻ കരട്ബിൽ തയാറാക്കി സർക്കാരിന് നൽകിയിരുന്നു. ‘ആഭിചാരങ്ങളും ദുർമന്ത്രവാദവും തടയലും ഇല്ലാതാക്കലും’ എന്നതാണ് കമ്മീഷൻ ശുപാർശ ചെയ്ത ബിൽ. കഴിഞ്ഞവർഷം പത്തനംതിട്ട ഇലന്തൂരിൽ നടന്ന നരബലിയുടെ പശ്ചാത്തലത്തിലാണ് നിയമം ഓർഡിനൻസായി കൊണ്ടുവന്നത്.
കുറ്റകൃത്യങ്ങൾക്ക് ഒരു വർഷംമുതൽ ഏഴുവർഷംവരെ തടവും 5000 രൂപ മുതൽ 50,000 രൂപവരെ പിഴയുമാണ് കരട് ബില്ലില്‍ കമ്മീഷൻ ശുപാർശ ചെയ്തിരുന്നത്. .മൃഗബലി, ശരീരത്തിൽ പീഡനമേൽപ്പിക്കുകയും മുറിവുണ്ടാക്കുകയും ചെയ്യുക, ഭൂതപ്രേത ആവാഹനം, നിധി കണ്ടെത്തുന്നതിനുള്ള മന്ത്രവാദം, ആഭിചാര ക്രിയകൾ, കൂടോത്രം തുടങ്ങി ഒട്ടേറെ കുറ്റങ്ങൾ കരട് നിയമത്തിൽ ഉൾപ്പെടുന്നു. എന്നാൽ, ഇവയിൽ പലതിനോടും ചേർന്ന് നിൽക്കുന്ന ആചാരങ്ങൾ പല മതങ്ങളിലുമുണ്ട്.
മതപരമായ ആചാരങ്ങളെ നിയമത്തിന്റെ പരിധിയിൽനിന്ന് ഒഴിവാക്കിയെങ്കിലും പ്രായോഗികമായി നടപ്പാക്കുക അത്ര എളുപ്പമല്ലെന്ന് തുടർന്നുനടന്ന ചർച്ചകളിൽ സർക്കാരിന് ബോധ്യപ്പെട്ടു. പല മതങ്ങളുമായി ബന്ധപ്പെട്ട ആചാരങ്ങളും അന്ധവിശ്വാസങ്ങളും തമ്മിലുള്ള അതിർവരമ്പ് നേർത്തതായതിനാൽ അവ വ്യാഖ്യാനിച്ച് നിയമത്തിന്റെ പരിധിയിൽ നിർവചിക്കുന്നതിനുള്ള പ്രയാസം നിയമ വകുപ്പും ശ്രദ്ധയിൽപ്പെടുത്തി.
പ്രതികരിക്കാൻ ഇവിടെ എഴുതുക: