വടക്കഞ്ചേരി: പന്നിയങ്കര ടോള് പ്ലാസയില് പ്രദേശവാസികള്ക്ക് ജൂലൈ ഒന്നു മുതല് ടോള് പിരിക്കുമെന്ന കരാര് കമ്പനി തീരുമാനത്തിനെതിരെ വടക്കഞ്ചേരി ജനകീയവേദി, പന്തലാംപാടം ജനകീയ കൂട്ടായ്മ, സംയുക്ത സമരസമിതി എന്നിവയുടെ നേതൃത്വത്തില് ടോള് പ്ലാസയില് പ്രതിഷേധ സമരം നടത്തി.
പ്രദേശവാസികളില് നിന്ന് ടോള് പിരിക്കാന് അനുവദിക്കില്ലെന്നും സര്വ്വീസ് റോഡ് ഉള്പ്പെടെയുള്ളവയുടെ നിര്മാണം പൂര്ത്തിയാക്കണമെന്നും ദേശീയപാതയില് ജീവന് നഷ്ടമായവര്ക്ക് നഷ്ടപരിഹാരം നല്കണമെന്നും യോഗം ആവശ്യപ്പെട്ടു.
ജനകീയവേദി ചെയര്മാന് ബോബന് ജോര്ജ് ഉദ്ഘാടനം ചെയ്തു. ജന. കണ്വീനര് ജിജോ അറയ്ക്കല് അധ്യക്ഷത വഹിച്ചു. പന്തലാംപാടം ജനകീയ കൂട്ടായ്മ പ്രതിനിധി പി.ജെ. ജോര്സി, ജനകീയവേദി വൈസ് ചെയര്മാന് സുരേഷ് വേലായുധന്, കണ്വീനര് ഷിബു ജോണ്, സി.സി.സുരേന്ദ്രന്, സി.കെ. അച്യുതന്, കെ.ശിവദാസ്, വി. ഗംഗാധരന് സംസാരിച്ചു. ടോള് പിരിവ് ആരംഭിച്ചാല് തടയുമെന്ന് സംയുക്ത സമരസമിതി ഭാരവാഹികള് അറിയിച്ചു.
