ന്യൂദല്‍ഹി: അരിവാള്‍ രോഗ നിര്‍മാര്‍ജന ദൗത്യത്തിനു പ്രധാനമന്ത്രി നരേന്ദ്ര മോദി നാളെ മധ്യപ്രദേശില്‍ തുടക്കം കുറിക്കും. പൊതു പരിപാടിയില്‍ ഗുണഭോക്താക്കള്‍ക്കുള്ള അരിവാള്‍ കോശ ജനിതക വിവര കാര്‍ഡുകളും അദ്ദേഹം വിതരണം ചെയ്യും. അരിവാള്‍ രോഗം ഉയര്‍ത്തുന്ന ആരോഗ്യപരമായ വെല്ലുവിളികളെ അഭിസംബോധന ചെയ്യുക (വിശേഷിച്ചും ഗോത്ര വര്‍ഗക്കാര്‍ക്കിടയില്‍) എന്നതാണു ദൗത്യം ലക്ഷ്യമിടുന്നത്. ബോധവല്‍ക്കരണം, രോഗബാധിത ഗിരിവര്‍ഗ മേഖലകളിലെ 40 വയസ്സു വരെയുള്ള ഏഴു കോടി പേരുടെ സാര്‍വത്രിക പരിശോധന, കേന്ദ്ര മന്ത്രാലയങ്ങളുടെയും സംസ്ഥാന ഗവണ്മെന്റുകളുടെയും സഹകരണത്തോടെയുള്ള കൗണ്‍സിലിങ് എന്നിവയില്‍ ദൗത്യം ശ്രദ്ധ കേന്ദ്രീകരിക്കും.
കേരളം, ഗുജറാത്ത്, മഹാരാഷ്‌ട്ര, രാജസ്ഥാന്‍, മധ്യപ്രദേശ്, ഝാര്‍ഖണ്ഡ്, ഛത്തീസ്ഗഢ്, പശ്ചിമ ബംഗാള്‍, ഒഡിഷ, തമിഴ്നാട്, തെലങ്കാന, ആന്ധ്രാപ്രദേശ്, കര്‍ണാടകം, അസം, ഉത്തര്‍പ്രദേശ്, , ബിഹാര്‍, ഉത്തരാഖണ്ഡ് എന്നിങ്ങനെ രാജ്യത്തെ 17 സംസ്ഥാനങ്ങളിലെ ഇരുനൂറിലധികം ജില്ലകളില്‍ പദ്ധതി നടപ്പാക്കും. കേരളത്തില്‍ വയനാട് ജില്ലയിലാകും പദ്ധതി നടപ്പാക്കുക .
ഒരു വ്യക്തിയുടെ ചുവന്ന രക്താണുക്കള്‍ വികലമാവുകയും അരിവാള്‍ പോലുള്ള ആകൃതി കൈക്കൊള്ളുകയും ചെയ്യുന്ന ജനിതക വൈകല്യമാണ് അരിവാള്‍ രോഗം. തദ്ദേശീയ ജനതയുടെ ഭാവിക്കും നിലനില്‍പ്പിനും വലിയ ഭീഷണി ഉയര്‍ത്തുന്ന ഒന്നാണിത്. ഈ രോഗം പടരുന്നതു സമയബന്ധിതമായി തടയേണ്ടത് അനിവാര്യമാണ്. ഇതിന്റെ പശ്ചാത്തലത്തിലാണ് കഴിഞ്ഞ ബജറ്റില്‍ അരിവാള്‍ രോഗ നിര്‍മാര്‍ജന ദൗത്യം പ്രഖ്യാപിച്ചത്. പദ്ധതിയുടെ നിരീക്ഷണത്തിനും സമയബന്ധിത നിര്‍വഹണത്തിനുമായി കേന്ദ്ര ഗവണ്മെന്റ് സിക്കിള്‍ സെല്‍ ദേശീയ പോര്‍ട്ടല്‍ വികസിപ്പിച്ചിട്ടുണ്ട്. ഈ പോര്‍ട്ടലിലൂടെ, പൗരന്മാര്‍ക്ക് രോഗവുമായി ബന്ധപ്പെട്ട ആരോഗ്യ സര്‍ട്ടിഫിക്കറ്റ് ഡൗണ്‍ലോഡ് ചെയ്യാനും വിവരങ്ങള്‍ നേടാനും, അരിവാള്‍ രോഗബാധിതരുടെ ജീവിത നിലവാരം മെച്ചപ്പെടുത്താനും കഴിയും.
ആയുഷ്മാന്‍ ഭാരത് – ആരോഗ്യ – സ്വാസ്ഥ്യ കേന്ദ്രങ്ങളില്‍ (എബി-എച്ച്ഡബ്ല്യുസി) പ്രാഥമികാരോഗ്യ പ്രവര്‍ത്തകരുടെ ശേഷി വര്‍ധിപ്പിക്കുന്നതിനുള്ള പരിശീലന മൊഡ്യൂളുകളും ആരോഗ്യ – കുടുംബക്ഷേമ മന്ത്രാലയം തയ്യാറാക്കിയിട്ടുണ്ട്. അരിവാള്‍ രോഗം തടയുന്നതിനായി പ്രാഥമിക രോഗ നിര്‍ണയം മുതല്‍ മൊത്തത്തിലുള്ള നിര്‍വഹണം വരെയുള്ള എല്ലാ അനുബന്ധ വശങ്ങളും ഇതില്‍ ഉള്‍പ്പെടുന്നു.
പ്രതികരിക്കാൻ ഇവിടെ എഴുതുക: