പത്തനംതിട്ട: റാന്നിയിൽ ഒപ്പം താമസിച്ചിരുന്ന യുവതിയെ ക്രിമിനൽ കേസ് പ്രതി വെട്ടിക്കൊന്നു. തടയാൻ ശ്രമിച്ച യുവതിയുടെ അച്ഛനും അമ്മയ്ക്കും സഹോദരിക്കും ആക്രമണത്തിൽ ഗുരുതര പരുക്ക്. കീക്കൊഴൂർ പുള്ളിക്കാട്ടിൽ പടി മലർവാടി ജംഗ്ഷന് സമീപം ഇരട്ടതല പനക്കൽ വീട്ടിൽ രജിത (27) ആണ് മരിച്ചത്. രജിതയുടെ പിതാവ് രാജു (60), അമ്മ ഗീത (51), സഹോദരി അപ്പു (18) എന്നിവർക്കാണ് വെട്ടേറ്റത്.
റാന്നി ബ്ലോക്ക്പടി വടക്കേടത്ത് അതുൽ സത്യൻ ആണ് ഇന്നലെ രാത്രി 9.30 ന് വീട്ടിൽ അതിക്രമിച്ചു കയറി 4 പേരെയും വെട്ടിയത്. രജിതയെ റാന്നി താലൂക്ക് ആശുപത്രിയിൽ പ്രവേശിപ്പിച്ചെങ്കിലും മരണം സംഭവിച്ചിരുന്നു. പിതാവ് രാജുവിനെ അടിയന്തര ശസ്ത്രക്രിയക്ക് വിധേയനാക്കി. നിരവധി ക്രിമിനൽ കേസുകളിൽ പ്രതിയാണ് അതുൽ എന്നും പോലീസ് അറിയിച്ചു.
ഒരാഴ്ച മുമ്പ് പത്തനാപുരത്തെ റബർ തോട്ടത്തിൽ രജിതയെ ഇയാൾ എത്തിച്ച് കഴുത്തിൽ കത്തിവച്ച് ഭീഷണിപ്പെടുത്തുന്ന വീഡിയോ രജിതയുടെ അമ്മയെ കാണിച്ച് മകളെ കൊല്ലുമെന്ന് ഭീഷണിപ്പെടുത്തിയിരുന്നതായി പറയുന്നു. ഭദ്രി, ദർശിത് എന്നിവരാണ് രജിതയുടെ മക്കൾ. ഒളിവിൽ പോയ പ്രതിക്കായി അന്വേഷണം ആരംഭിച്ചതായി റാന്നി പോലീസ് അറിയിച്ചു.
