ചെന്നൈ: ഏഴ് വര്‍ഷമായി ഇന്ത്യന്‍ സൂപ്പര്‍ ലീഗി(ഐഎസ്എല്‍)ല്‍ ചെന്നൈയിന്‍ എഫ്‌സിക്കായി കളിക്കുന്ന ഇന്ത്യന്‍ ഫുട്‌ബോള്‍ താരം അനിരുദ്ധ് ഥാപ്പ മോഹന്‍ ബഗാനിലേക്ക്. നീണ്ടകാലത്തെ ചെന്നൈയിന്‍ ബന്ധത്തില്‍ രണ്ട് തവണ ഐഎസ്എല്‍ കിരീടം നേടിയാണ് ചെന്നൈയിന്റെ അഭിവാജ്യഘടകമായ ഇന്ത്യന്‍ താരം ക്ലബ്ബ് വിട്ടുപോകുന്നത്.
25കാരനായ ഥാപ്പയെ മോഹന്‍ ബഗാന്‍ സൂപ്പര്‍ ജയന്റ്‌സ് മൂന്ന് കോടി രൂപയ്‌ക്കാണ് സ്വന്തമാക്കിയിരിക്കുന്നത്. ഡെറാഡൂണ്‍ സ്വദേശിയായ താരം 2015-16 ഐഎസ്എല്‍ സീസണിലാണ് ചെന്നൈയിനിലെത്തുന്നത്. അക്കൊല്ലം ടീം ആദ്യമായി കിരീടം നേടുമ്പോള്‍ ഥാപ്പ ടീമിലുണ്ടായിരുന്നെങ്കിലും 2017-18 സീസണില്‍ ചെന്നൈയിന്റെ രണ്ടാം കിരീട നേട്ടത്തില്‍ നിര്‍ണായക പ്രകടനമാണ് താരം പുറത്തെടുത്തത്.
125 കളികളില്‍ ചെന്നൈയിനുവേണ്ടി കളിച്ചു. 13 ഗോളുകള്‍ നേടി. താരത്തിന്റെ മികവിലാണ് ടീം 2019-20 സീസണ്‍ ഐഎസ്എല്‍ ഫൈനലിലും 2019 സൂപ്പര്‍ കപ്പ് ഫൈനലിലും പ്രവേശിച്ചത്. കഴിഞ്ഞ രണ്ട് സീസണുകളില്‍ ചെന്നൈയിന്‍ നായകന്‍ കൂടിയാണ് ഥാപ്പ.
പ്രതികരിക്കാൻ ഇവിടെ എഴുതുക: