വടകര: അടുത്ത പൊതു തെരഞ്ഞെടുപ്പിലും നരേന്ദ്ര മോദി വീണ്ടും അധികാരത്തില്‍ വരുമെന്നും ഇന്ത്യയില്‍ കോണ്‍ഗ്രസ് ഇതര സര്‍ക്കാറിന്റെ ഹാട്രിക് വിജയമാകും അതെന്നും മുതിര്‍ന്ന ബിജെപി നേതാവും മുന്‍ കേന്ദ്രമന്ത്രിയുമായ മുക്താര്‍ അബ്ബാസ് നഖ്വി.
ഇന്ത്യയുടെ യശ്ശസ് ലോകത്തിന്റെ നെറുകയില്‍ എത്തിച്ച പ്രധാനമന്ത്രിയെ താഴെയിറക്കാനും, ജനാധിപത്യത്തെ കശാപ്പ് ചെയ്യാനുമുള്ള സാമ്രാജ്യത്വ ശക്തികളുടെ മോഹം ജനം പുച്ഛിച്ചുതള്ളുമെന്നും അദ്ദേഹം വാര്‍ത്താസമ്മേളനത്തില്‍ പറഞ്ഞു. മോദി സര്‍ക്കാര്‍ ഒമ്പത് വര്‍ഷം പൂര്‍ത്തിയാക്കിയതിന്റെ ഭാഗമായി സംഘടിപ്പിച്ച സമ്പര്‍ക്ക സേ സമര്‍ത്ഥന്‍ കാമ്പയിനിന്റെ ഭാഗമായാണ് നഖ്വി വടകരയില്‍ എത്തിയത്.
മതനിരപേക്ഷതയേയും രാഷ്‌ട്രത്തിന്റെ ഭദ്രതയേയും തകര്‍ക്കാന്‍ ചില വര്‍ഗ്ഗീയ, രാഷ്‌ട്രീയ ശക്തികള്‍ നടത്തുന്ന ക്രിമിനല്‍ ഗൂഢാലോചനക്കെതിരെ ദേശീയ ബോധമുള്ള ജനങ്ങള്‍ ജാഗ്രത പാലിക്കണം. ലോകത്ത് ഏറ്റവും കൂടുതല്‍ ന്യൂനപക്ഷങ്ങള്‍ ഭാരതത്തിലാണ് ഉള്ളത്. അവര്‍ക്ക് ലോകത്ത് മറ്റെങ്ങുമില്ലാത്ത അവകാശങ്ങളും അവസരങ്ങളുമാണ് രാജ്യത്തുള്ളത്.
എന്നാല്‍ ചില രാജ്യദ്രോഹ ശക്തികള്‍ ന്യൂനപക്ഷത്തെ സാക്ഷിനിര്‍ത്തി ഇന്ത്യയെ അപകീര്‍ത്തിപ്പെടുത്താന്‍ ശ്രമിക്കുകയാണ്. ചില രാഷ്‌ട്രീയ കക്ഷികള്‍ ഇവര്‍ക്കൊപ്പം നില്‍ക്കുന്നുണ്ടെന്നും അദ്ദേഹം പറഞ്ഞു. വാര്‍ത്താ സമ്മേളനത്തില്‍ പാര്‍ട്ടി ദേശീയ സമിതിയംഗം കെ.പി. ശ്രീശന്‍, കോഴിക്കോട് ജില്ലാ പ്രസിഡന്റ് വി.കെ. സജീവന്‍, കണ്ണൂര്‍ ജില്ലാ പ്രസിഡന്റ് എന്‍. ഹരിദാസ് എന്നിവരും പങ്കെടുത്തു.
പ്രതികരിക്കാൻ ഇവിടെ എഴുതുക: