ചെങ്ങന്നൂര്‍: സിപിഎമ്മിന്റെ ശിങ്കിടികളായി പോലീസ് മാറുന്നതാണ് പോരുവഴിയിലും ചെങ്ങന്നൂരിലും കണ്ടതെന്ന് ബിജെപി സംസ്ഥാന അധ്യക്ഷന്‍ കെ. സുരേന്ദ്രന്‍. എ.എ. റഹിമിനെതിരെ എഫ്ബി പോസ്റ്റ് ഇട്ടതിന് അറസ്റ്റിലായ കോട്ട അനീഷിന്റെ അമ്മ താമര, അച്ഛന്‍ സി. മണി എന്നിവരെ ആശുപത്രിയില്‍ സന്ദര്‍ശിച്ചതിനു ശേഷം സംസാരിക്കുകയായിരുന്നു അദ്ദേഹം.
പോലീസിന്റെ നരനായാട്ടാണ് നടന്നത്. പുലര്‍ച്ചെ മൂന്നിനാണ് വീടുകയറി പോലീസ് അതിക്രമം കാട്ടിയത്. അനീഷിന്റെ പ്രായമായ അച്ഛനമ്മമാരോട് പോലും നിന്ദ്യമായ പെരുമാറ്റമാണ് ഉണ്ടായത്. കൊടുംക്രിമിനലുകളായ സിപിഎമ്മുകാര്‍ അഴിമതിയും ക്രമക്കേടും നടത്തി സമൂഹത്തില്‍ വിലസുമ്പോഴും പോലീസിന് കേസില്ല. ബിജെപി-ആര്‍എസ്എസ് പ്രവര്‍ത്തകരെ തെരഞ്ഞുപിടിച്ച് കള്ളക്കേസില്‍ കുടുക്കുകയാണ്. രണ്ടാഴ്ച മുമ്പ് പോരുവഴിയില്‍ ബിജെപി മെമ്പര്‍ക്കെതിരെയും ഇത്തരത്തില്‍ പോലീസ് നടപടിയുണ്ടായി. സിപിഎം ശിങ്കിടികളായി പോലീസ് മാറുന്നത് അത്യന്തം അപകടകരമാണ്.
സിപിഎം നേതാവ് വാട്‌സ്ആപ്പില്‍ പരാതി നല്കിയാല്‍ മതി പോലീസ് നടപടിയെടുക്കുമെന്നതാണ് അവസ്ഥ. മറ്റ് രാഷ്‌ട്രീയപാര്‍ട്ടി നേതാക്കള്‍ക്കെതിരെ എത്ര ഹീനമായ പോസ്റ്റുകള്‍ ഇട്ടാലും നടപടിയില്ല, പ്രതികള്‍ സിപിഎമ്മുകാരെങ്കില്‍ അറസ്റ്റുമില്ലെന്ന് സുരേന്ദ്രന്‍ പറഞ്ഞു.
ആലപ്പുഴ ജില്ലാ പ്രസിഡന്റ് എം.വി. ഗോപകുമാര്‍, പത്തനംതിട്ട ജില്ലാ പ്രസിഡന്റ് വി.എ. സൂരജ്, ജനറല്‍ സെക്രട്ടറിമാരായ കെ. ബിനുമോന്‍, പ്രദീപ് അയിരൂര്‍, പ്രമോദ് കാരയ്‌ക്കാട്, ദീപ ജി. നായര്‍, അനീഷ് മുളക്കുഴ, അജി ആര്‍. നായര്‍, ബൈജു കോട്ട എന്നിവരും ഒപ്പമുണ്ടായിരുന്നു.
പ്രതികരിക്കാൻ ഇവിടെ എഴുതുക: