തിരുവനന്തപുരം: വീട്ടുജോലിക്കാരിയുടെ പ്രായപൂര്‍ത്തിയാകാത്ത മകളെ ലൈംഗിക പീഡനത്തിന് ഇരയാക്കിയ മോന്‍സണ്‍ മാവുങ്കലിനെതിരായ പോക്സോ കേസ് വിധി ഇന്ന്. വിചാരണ പൂര്‍ത്തിയായ കേസില്‍ എറണാകുളം പോക്സോ കോടതി ജഡ്ജി കെ സോമനാണ് ഇന്ന് 11 മണിയോടെ വിധി പറയുക. വിദ്യാഭ്യാസത്തിനുള്ള സഹായം വാഗ്ദാനം ചെയ്ത് ഇയാള്‍ വീട്ടുജോലിക്കാരിയുടെ മകളെ പലതവണ പീഡിപ്പിച്ചുവെന്നാണ് കേസ്.
പെണ്‍കുട്ടിയുടെ അമ്മ നല്‍കിയ പരാതിയില്‍ എറണാകുളം നോര്‍ത്ത് പോലീസ് റജിസ്റ്റര്‍ ചെയ്ത കേസിലാണ് വിധി. പീഡനം നടന്നത് 2019 ല്‍ ആണെങ്കിലും പുരാവസ്തു തട്ടിപ്പ് കേസില്‍ 2021 ല്‍ മോന്‍സണ്‍ അറസ്റ്റിലായതിനു ശേഷമാണ് പെണ്‍കുട്ടിയുടെ അമ്മ പരാതി നല്‍കിയത്. മോന്‍സണെ ഭയന്നതിനാലാണ് പരാതി നല്‍കാന്‍ വൈകിയതെന്ന് അമ്മ പോലീസിന് മൊഴി നല്‍കിയിരുന്നു. സംഭവം നടക്കുമ്പോള്‍ 17 വയസായിരുന്നു പെണ്‍കുട്ടിക്ക്. തുടര്‍വിദ്യാഭ്യാസം ഉള്‍പ്പെടെ വാഗ്ദാനം ചെയ്ത് നിരവധി തവണ പലസ്ഥലങ്ങളില്‍ എത്തിച്ച് പീഡിപ്പിക്കുകയായിരുന്നു. അമ്മയോടൊപ്പം മോന്‍സന്റെ വീട്ടില്‍ എത്തിയപ്പോഴും പീഡനം നടന്നിട്ടുണ്ട്.
കൊച്ചിയിലെ വിവിധ സ്ഥലങ്ങളില്‍ വെച്ചും പീഡനം നടന്നുവെന്ന് പരാതിയില്‍ പറയുന്നു. അന്വേഷണത്തിന്റെ ഒരു ഘട്ടത്തില്‍ പോലും പെണ്‍കുട്ടി മൊഴി മാറ്റിയിരുന്നില്ല. ശക്തമായ തെളിവുകളും മോന്‍സനെതിരെ പോലീസ് ശേഖരിച്ചിട്ടുണ്ട്. വിധി പറയുക. മോന്‍സനെതിരെ പതിനൊന്നോളം കേസുകള്‍ നിലവിലുണ്ട്. ഇതില്‍ കെ സുധാകരന്‍ രണ്ടാം പ്രതിയായ വഞ്ചനാ കേസും ഉള്‍പ്പെടുന്നു. കേസുകളില്‍ വാദം പൂര്‍ത്തിയാക്കി വിചാരണ കഴിഞ്ഞ് വിധി പറയുന്ന ആദ്യത്തെ കേസ് കൂടിയാണിത്.
പ്രതികരിക്കാൻ ഇവിടെ എഴുതുക: