കൊല്ലം: മലദ്വാരത്തില്‍ ഒളിപ്പിച്ച് കടത്താന്‍ ശ്രമിച്ചതുള്‍പ്പടെ 55 ഗ്രാം എംഡിഎംഎ രണ്ടു കേസുകളിലായി കൊല്ലം സിറ്റി പോലീസ് പിടികൂടി. കൊല്ലം കരിക്കോട് നിക്കി വില്ലയില്‍ താമസിക്കുന്ന ശക്തികുളങ്ങര സ്വദേശി നിഖില്‍ സുരേഷ് (30), കൊട്ടിയം പറക്കുളം വലിയവിള വീട്ടില്‍ മന്‍സൂര്‍ റഹീം (30) എന്നിവരാണ് പിടിയിലായത്.
ഇന്നലെ രാവിലെ കൊട്ടിയം ബസ്‌സ്റ്റോപ്പില്‍ നിന്നാണ് ഇവരെ പോലീസ് പിടികൂടിയത്. ഇവര്‍ സ്ഥിരമായി ബെംഗളൂരുവില്‍ നിന്ന് ലഹരി വസ്തുക്കള്‍ നാട്ടിലെത്തിച്ച് വിതരണം ചെയ്യുകയാണ്. ജില്ലാ പോലീസ് മേധാവി മെറിന്‍ ജോസഫിന് ലഭിച്ച രഹസ്യ വിവരത്തിന്റെ അടിസ്ഥാനത്തില്‍ കൊല്ലം സിറ്റി ഡാന്‍സാഫ് ടീമിന്റെ നിരീക്ഷണത്തില്‍ ആയിരുന്നു ഇരുവരും.
ബെംഗളുരുവില്‍ നിന്ന് ലഹരി മരുന്നുമായി എത്തിയ ഇരുവരെയും കൊട്ടിയം ബസ്സ്റ്റാന്റില്‍ നിന്ന് സിറ്റി ജില്ലാ ഡാന്‍സാഫ് ടീമും ചാത്തന്നൂര്‍, കൊട്ടിയം, കണ്ണനല്ലൂര്‍ പോലീസും ചേര്‍ന്ന് പിടികൂടുകയായിരുന്നു.
വിദേശത്ത് ജോലി ചെയ്യുകയായിരുന്ന നിഖില്‍ സുരേഷ് മൂന്നു മാസങ്ങള്‍ക്ക് മുന്‍പാണ് നാട്ടിലെത്തിയത്. ഇയാള്‍ സ്ഥിരമായി എംഡിഎംഎ ഉപയോഗിക്കുന്നയാളാണ്. ബെംഗളൂരുവില്‍ നിന്ന് പെണ്‍സുഹൃത്തിന്റെ സഹായത്താടെ ലഭിച്ച ലഹരിയുമായെത്തിയ ഇയാളുടെ ദേഹപരിശോധന നടത്തിയപ്പോള്‍ വസ്ത്രത്തിനുള്ളില്‍ പ്രത്യേക അറയില്‍ ഒളിപ്പിച്ച നിലയില്‍ 27 ഗ്രാം എംഡിഎംഎ പോലീസ് കണ്ടെത്തുകയായിരുന്നു.
ബെംഗളൂരുവില്‍ നിന്ന് ഇതേ ബസിലെത്തിയ മന്‍സൂര്‍ റഹീംനെ വിശദമായി ദേഹ പരിശോധിച്ചെങ്കിലും എംഡിഎംഎ കണ്ടെത്താന്‍ കഴിഞ്ഞിരുന്നില്ല. തുടര്‍ന്ന് ബാഗുകളും മറ്റും പരിശോധിക്കുകയും വിശദമായ ചോദ്യം ചെയ്യല്‍ നടത്തിയപ്പോഴാണ് എംഡിഎംഎ മലദ്വാരത്തില്‍ കടത്തുന്നതിനെ കുറിച്ച് വിവരം ലഭിക്കുന്നത്.
ഇതിന്റെ അടിസ്ഥാനത്തില്‍ കൊല്ലം ജില്ലാ ആശുപത്രിയിലെത്തിച്ച് എനിമ കൊടുത്താണ് മലദ്വാരത്തിനുള്ളില്‍ കോണ്ടത്തിനുള്ളിലായി ഒളിപ്പിച്ച 27.4 ഗ്രാം എംഡിഎംഎ പുറത്തെടുത്തത്. കേരളത്തില്‍ തന്നെ ആദ്യമായാണ് ഒരാള്‍ ഇത്തരത്തില്‍ മയക്ക്മരുന്ന് കടത്തി പോലീസ് പിടിയിലാകുന്നത്. പിടികൂടിയ എംഡിഎംഎ സ്‌കൂള്‍, കോളേജ് വിദ്യാര്‍ഥികള്‍ക്ക് ചില്ലറ വില്‍പ്പനയ്‌ക്കായി എത്തിച്ചതാണെന്ന് ഇരുപ്രതികളും പോലീസിനോട് സമ്മതിച്ചു.
കൊല്ലം സിറ്റി പോലീസ് കമ്മീഷണര്‍ മെറിന്‍ ജോസഫിന്റെ നിര്‍ദേശത്തിന്റെ അടിസ്ഥാനത്തില്‍ മയക്കുമരുന്നിന്റെ ഉപയോഗവും വില്‍പ്പനയും തടയുന്നതിനായി കൊല്ലം സിറ്റി പോലീസ് ജില്ലയുടെ വിവിധ ഭാഗങ്ങളില്‍ റെയ്ഡ് ശക്തമാക്കിയിരിക്കുകയാണ്.
കുറച്ച് ദിവസങ്ങള്‍ക്ക് മുന്‍പ് 14 ഗ്രാം എംഡിഎംഎയും 4 കിലോ കഞ്ചാവുമായി ചാത്തന്നൂര്‍ സ്വദേശിയായ സനൂജ് പോലീസ് പിടിയിലായിരുന്നു. പൊതുജനങ്ങള്‍ക്ക് ലഹരി സംബന്ധമായ വിവരങ്ങള്‍ കൈമാറുന്നതിനായി 9995966666 നമ്പരില്‍ ബന്ധപ്പെടാവുന്നതാണ്. മയക്കുമരുന്ന് വില്‍പ്പന നടത്തുന്നവര്‍ക്കും ഉപയോഗിക്കുന്നവര്‍ക്കുമെതിരെ കര്‍ശന നടപടി സ്വീകരിക്കുമെന്ന് കമ്മീഷണര്‍ അറിയിച്ചു.
പ്രതികരിക്കാൻ ഇവിടെ എഴുതുക: