ജോലി വാഗ്ദാനം ചെയ്ത് ലക്ഷങ്ങളുടെ തട്ടിപ്പ് രേഷ്മക്കെതിരെ കൂടുതല്‍ പരാതികള്‍

ആലത്തൂര്‍: ഗുരുവായൂര്‍ ദേവസ്വം ബോര്‍ഡില്‍ ജോലി വാങ്ങിക്കൊടുക്കാമെന്ന് തെറ്റിദ്ധരിപ്പിച്ച് ലക്ഷങ്ങള്‍ സ്വന്തമാക്കിയ ആലത്തൂര്‍ വെങ്ങന്നൂര്‍ സ്വദേശി രേഷ്മ രാജപ്പന്റെ (26) തട്ടിപ്പിന് കുനിശ്ശേരി മുല്ലക്കല്‍ സുശാന്തും ഇരയായി. 2,70,000 രൂപയാണ് സുശാന്തിന് നഷ്ടമായതെന്ന് ആലത്തൂര്‍ എസ്‌ഐ: എസ്. അനീഷ് പറഞ്ഞു.

കോട്ടയം കറുകച്ചാല്‍, തൃശൂര്‍, ഗുരുവായൂര്‍, പാലക്കാട് നോര്‍ത്ത്, വടക്കഞ്ചേരി, നെന്മാറ പോലീസ് സ്റ്റേഷന്‍ പരിധികളിലായി നിരവധിപേരാണ് രേഷ്മയുടെ തട്ടിപ്പിനിരയായത്. 25 ലക്ഷത്തിലേറെ രൂപയുടെ തട്ടിപ്പ് നടത്തിയെന്നാണ് പോലീസിന് ലഭിച്ച വിവരം. കോട്ടയം ജില്ലാ ജയിലില്‍ റിമാന്റില്‍ കഴിയുന്ന ഇവരെ ആലത്തൂരിലെത്തിച്ച് അറസ്റ്റ് രേഖപ്പെടുത്തി ആലത്തൂര്‍ കോടതിയില്‍ ഹാജരാക്കിയ ശേഷം കോട്ടയത്തേക്ക് തിരികെ കൊണ്ടുപോയി.  

ആലത്തൂരില്‍ തട്ടിപ്പിന് ഒത്താശ ചെയ്ത രണ്ടുപേര്‍കൂടി കേസില്‍ പ്രതികളാകുമെന്നാണ് സൂചന. ഇവരില്‍ ഒരാള്‍ പോലീസുകാരനാണ്. ദേവസ്വം വിജിലന്‍സ് എന്ന ബോര്‍ഡ് വെച്ച കാറിലാണ് ജോലി ആവശ്യപ്പെടുന്നവരെ കാണാന്‍ രേഷ്മ എത്തിയിരുന്നത്. കോട്ടയത്ത് വിവാഹ വാഗ്ദാനം നല്‍കി യുവാവില്‍ നിന്ന് അഞ്ചുലക്ഷം തട്ടിയെടുത്തെന്നും കേസുണ്ട്.

രേഷ്മ രാജപ്പനെതിരെ ആലത്തൂരില്‍ രണ്ട് പരാതികള്‍ കൂടി ലഭിച്ചു. വെങ്ങന്നൂര്‍ ആലക്കല്‍ ഹൗസില്‍ പ്രകാശന്റെ മകന്‍ പ്രവീഷില്‍ നിന്ന് രണ്ടുതവണകളിലായി പത്തുലക്ഷവും വെങ്ങന്നൂര്‍ ബാലന്റെ മകള്‍ മഞ്ജുഷയില്‍ നിന്ന് രണ്ടു തവണകളിലായി 5,50,000 രൂപയുമാണ് വാങ്ങിച്ചത്. 2022 മെയ്, ജൂണ്‍ മാസങ്ങളിലാണ് ഇവരില്‍ നിന്ന് പണം കൈപ്പറ്റിയത്.