കൊച്ചി : അരിക്കൊമ്പനെ കേരളത്തിലേക്ക് കൊണ്ടുവരണം. സസ്ഥാനത്ത് തന്നെ മതിയായ സുരക്ഷ ഉറപ്പാക്കണമെന്നാവശ്യപ്പെട്ട ട്വന്റി- ട്വന്റി ചീഫ് കോര്ഡിനേറ്റര് സാബു എം. ജേക്കബിനെതിരെ ഹൈക്കോടതി. സാബു എം. ജേക്കബ് സമര്പ്പിച്ച ഹര്ജിയിലെ സത്യസന്ധതയില് സംശയമുണ്ട്. എന്തടിസ്ഥാനത്തിലാണ് ആനയെ കേരളത്തിലേക്ക് കൊണ്ടുവരണമെന്ന് പറയുന്നതെന്നും ഹൈക്കോടതി പറഞ്ഞു.
ആന നിലവില് തമിഴ്നാട് കമ്പം ഭാഗത്തായാണ് ഉള്ളത്. അരിക്കൊമ്പനെ മയക്കുവെടിവെച്ച് ഉള്വനത്തിലേക്ക് വിടാനാണ് തമിഴ്നാട് സര്ക്കാരിന്റെ തീരുമാനം. ഇതിനായി പ്രത്യേക സംഘത്തെ രൂപീകരിച്ച് നടപടികള് കൈക്കൊള്ളുകയാണ്.
തമിഴ്നാട് വനം വകുപ്പ് ആനയെ എന്തെങ്കിലും തരത്തില് ഉപദ്രവിച്ചതായി തെളിവില്ല. ആനയെ സംരക്ഷിക്കാമെന്നും അവര് അറിയിച്ചിട്ടുണ്ട്. ആ സ്ഥിതിക്ക് പിന്നെ എന്തിനാണ് ആനയെ തിരികെ കൊണ്ട് വരണമെന്ന് പറയുന്നത്. കേരള സര്ക്കാര് കടബാധ്യതയിലാണ്. അരിക്കൊമ്പന് ദൗത്യത്തിനായി സര്ക്കാര് ചെലവഴിച്ചത് 80 ലക്ഷം രൂപയാണ്.
സാബു ആണെങ്കില് ബിസിനസില് മികച്ച് നില്ക്കുന്നു. തമിഴ്നാട് സര്ക്കാര് ആനയെ മാറ്റാന് തയ്യാറായാല് എല്ലാ ചിലവും സാബു വഹിക്കുമോയെന്നും ഹൈക്കോടതി ചോദിച്ചു. രാഷ്ട്രീയ നേതാവ് കൂടിയല്ലേ നിങ്ങള് ആനയെ കൊണ്ടുവരുന്നതിന്റെ മുഴുവന് ചെലവും വഹിക്കുമോ, പൊതുതാത്പര്യ ഹര്ജികളില് പൊതുതാത്പര്യം ഉണ്ടാകണം. അരിക്കൊമ്പന് ഹര്ജിയില് അതുണ്ടോ, ജീവിതത്തില് എന്നെങ്കിലും ഉള്ക്കാട്ടില് പോയ അനുഭവം ഉണ്ടോയെന്നും സാബു എം. ജേക്കബിനോട് കോടതി ചോദിച്ചു.
ഹര്ജിക്കാരന് രാഷ്ട്രീയ പാര്ട്ടി നേതാവാണ്. ആ ഉത്തരവാദിത്തത്തോട് കൂടി പെരുമാറണം. അരിക്കൊമ്പനെ കാടുകയറ്റാമെന്ന ഉത്തരവാദിത്തം തമിഴ്നാട് സര്ക്കാര് ഏറ്റെടുക്കുകയാണ് ചെയ്തത്. കേരളത്തില് രജിസ്റ്റര് ചെയ്ത രാഷ്ട്രീയ പാര്ട്ടിയുടെ നേതാവിന് തമിഴ് നാട്ടിലെ വിഷയത്തില് എന്ത് കാര്യമാണുള്ളത്. തമിഴ്നാട്ടില് നടക്കുന്ന കാര്യങ്ങളില് പരാതി ഉണ്ടെങ്കില് മദ്രാസ് ഹൈക്കോടതിയെ സമീപിക്കണമെന്നും ഹൈക്കോടതി നിര്ദ്ദേശിച്ചു.
