കമ്പം : അരിക്കൊമ്പനെ കണ്ട് ഭയന്ന് വാഹനത്തില് നിന്ന് വീണ് ഗുരുതരമായി പരിക്കേറ്റ കമ്പം സ്വദേശി മരിച്ചു. തേനി മെഡിക്കല് കോളേജ് ആശുപത്രിയില് ചികിത്സയിലായിരുന്ന ബാല് രാജാണ്(65) മരിച്ചത്. ചൊവ്വാഴ്ച രാവിലെയോടെയാണ് മരണം സ്ഥിരീകരിച്ചത്.
കമ്പത്ത് ജനവാസ മേഖലയില് ഇറങ്ങിയ അരികൊമ്പന്റെ മുന്നില് ഇയാള് അകപ്പെടുകയായിരുന്നു. ആനയെ ഭയന്ന് ബൈക്കില് നിന്ന് നിലത്തേയ്ക്ക് വീണ ബാല് രാജിന്റെ തലയ്ക്കും വയറിനും ഗുരുതരമായി പരിക്കേറ്റിരുന്നു. ഉടന് തന്നെ കമ്പത്തെ ആശുപത്രിയില് പ്രവേിശിപ്പിച്ചു. തുടര്ന്ന് ആരോഗ്യനില വഷളായതോടെ തേനി മെഡിക്കല് കോളേജ് ആശുപത്രിയില് തീവ്ര പരിചരണ വിഭാഗത്തിലേക്ക് മാറ്റുകയായിരുന്നു.
നിലവില് ബാല് രാജിന്റെ മൃതദേഹം മെഡിക്കല് കോളേജ് ആശുപത്രി മോര്ച്ചറിയിലാണുള്ളത്. പോസ്റ്റുമോര്ട്ടത്തിന് ശേഷം മൃതദേഹം ഹന്ധുക്കള്ക്ക് വിട്ടു നല്കും. അതേസമയം അരിക്കൊമ്പനെ വെടിവെക്കാനുള്ള തമിഴ്നാട് വനംവകുപ്പ് സംഘത്തിന്റെ ദൗത്യം ഇന്നും തുടരും.
