ദൃശ്യം എന്ന മോഹന്‍ലാല്‍-ജിത്തുജോസഫ് സിനിമ കൊറിയന്‍ ഭാഷയിലേക്ക്. മികച്ച സിനിമയ്‌ക്കുള്‍പ്പെടെ നാല് ഓസ്കാര്‍ അവാര്‍ഡുകള്‍ നേടിയ പാരസൈറ്റ് എന്ന കൊറിയന്‍ സിനിമയിലെ അഭിനേതാവ് സോങ് കാങ് ഹൊ ജോര്‍ജ്ജുകുട്ടിയായി വേഷമിടും. മികച്ച അഭിനയ സാധ്യതയുള്ള കഥാപാത്രം എന്ന നിലയിലാണ് സോങ് കാങ് ഹൊ ഈ വേഷം സ്വീകരിക്കുന്നത്.
സോങ് കാങ് ഹൊ ഇതില്‍ നിര്‍മ്മാണ പങ്കാളികൂടിയാണ്. ഹിന്ദിയില്‍ ദൃശ്യം നിര്‍മ്മിച്ച നിര്‍മ്മാതാവ് കുമാര്‍ മംഗാട് പഥകും ഈ സംരംഭത്തില്‍ പങ്കാളിയാണ്. കുടുംബമൂല്യങ്ങള്‍ക്കും സദാചാരത്തിനും പ്രാധാന്യം നല്‍കുന്ന കൊറിയന്‍ ജീവിതപശ്ചാത്തലത്തില്‍ ദൃശ്യത്തിന് ഏറെ പ്രസക്തിയുണ്ടെന്ന് കരുതുന്നു.
കൊറിയന്‍ പ്രൊഡ്യൂസറായ ചോയ് ജെയ് വണ്‍, സംവിധായകന്‍ കിം ജെയ് വൂന്‍ എന്നിവരാണ് ദൃശ്യം കൊറിയന്‍ ഭാഷയില്‍ നിര്‍മ്മിക്കുന്നതിന് പിന്നിലെ മറ്റ് രണ്ട് പേര്‍.
ഇതുവരെ മലയാളം, ഹിന്ദി എന്ന ഭാഷകളില്‍ നിര്‍മ്മിച്ച ദൃശ്യം വന്‍ വിജയമായിരുന്നു. അജയ് ദേവ്ഗണും ശ്രിയ ശരണും പ്രധാന വേഷങ്ങളി‍ല്‍ അഭിനയിച്ച ഹിന്ദിയിലെ ദൃശ്യം വന്‍ ബോക്സോഫീസ് വിജയമായിരുന്നു.
കാന്‍സ് ഫിലിം ഫെസ്റ്റിവലിലാണ് ഈ പ്രഖ്യാപനമുണ്ടായത്.
പ്രതികരിക്കാൻ ഇവിടെ എഴുതുക: