ഓക്‌സെ(ഫ്രാന്‍സ്): താരസമ്പന്നമായ ഫ്രഞ്ച് ക്ലബ്ബ് പാരിസ് സെന്റ് ജെര്‍മെയി(പിഎസ്ജി)ന് സീസണില്‍ ഏക പ്രതീക്ഷയായ ഫ്രഞ്ച് ലിഗ് വണ്‍ ടൈറ്റില്‍ നേടാന്‍ ഇന്ന് അവസരം. രാത്രി 12.15ന് ഓക്‌സെയ്‌ക്കെതിരെ നടക്കുന്ന മത്സരത്തില്‍ ജയിക്കണം. ഒപ്പം ലെന്‍സ് ഇന്ന് തോല്‍ക്കുക കൂടി വേണം. പിഎസ്ജിയുടെ കളിക്ക് മുമ്പ് ഇന്ന് രാത്രി 8.35ന് ലോറിയെന്റിനെതിരെയാണ് ലെന്‍സിന്റെ മത്സരം.
ലോറിയെന്റിന്റെ മൈതാനത്ത് നടക്കുന്ന മത്സരത്തില്‍ ലെന്‍സ് തോക്കുകയാണെങ്കില്‍ പിഎസ്ജിക്ക് സമനില മതിയാകും കപ്പടിക്കാന്‍. സീസണില്‍ യൂറോപ്പിലെ പ്രമുഖ ടൈറ്റിലുകളില്‍ നിന്നെല്ലാം നേരത്തെ പുറത്തായ പിഎസ്ജിക്ക് ഇത്തവണ ഫ്രഞ്ച് കപ്പ് പോലും നേടാനായില്ല. സൂപ്പര്‍ താരങ്ങളായ ലയണല്‍ മെസ്സി, നെയ്മര്‍, കിലിയന്‍ എംബപ്പെ, സെര്‍ജിയോ റാമോസ് എന്നിവരെല്ലാം ഉള്‍പ്പെട്ട വമ്പന്‍ താരസാന്നിധ്യമുള്ള ടീമാണ് ഇത്തവണത്തെ പിഎസ്ജി.
ലീഗ് വണില്‍ പിഎസ്ജി ഏറെക്കുറേ ഉറപ്പിച്ചുകഴിഞ്ഞു. എങ്കിലും ഇത്രയും വലിയ താര ധാരാളിത്തമുള്ള ടീം ചാമ്പ്യന്‍പട്ടം ഉറപ്പിക്കുന്നത് അവസാന കളി വരെ നീട്ടിക്കൊണ്ടുപോകുന്നത് വലിയ ക്ഷീണമാകും. ലീഗിലെ 35 കളികള്‍ പൂര്‍ത്തിയാക്കുമ്പോള്‍ 81 പോയിന്റ് ആണ് പിഎസ്ജിക്കുള്ളത്. തൊട്ടുപിന്നിലുള്ള ലെന്‍സിന് 75 പോയിന്റ്. ഇന്ന് ലെന്‍സ് തോറ്റ ശേഷം പിഎസ്ജി സമനിലയിലൂടെ ഒരു പോയിന്റ് നേടിയാല്‍ പോലും കിരീടം ഉറപ്പിക്കുന്ന വിധത്തിലാണ് പോയിന്റ് പട്ടിക.
ജന്മഭൂമി ഓണ്‍ലൈന്‍
പ്രതികരിക്കാൻ ഇവിടെ എഴുതുക: