ന്യദല്‍ഹി: ക്രിക്കറ്റ് താരം മുഹമ്മദ് ഷമിയുടെ തലാഖ് നിരോധിക്കണമെന്ന് ആവശ്യപ്പെട്ട് ഭാര്യ ഹസിന്‍ ജഹാന്‍ നല്‍കിയ ഹര്‍ജിയില്‍ സുപ്രീം കോടതി നോട്ടീസ്. ചീഫ് ജസ്റ്റിസ് ഡി.വൈ.ചന്ദ്രചൂഡ്, ജസ്റ്റിസ് പി.എസ് നരസിംഹ, ജസ്റ്റിസ് ജെ.ബി പര്‍ദ്ദിവാലാ എന്നിവരടങ്ങിയ ബെഞ്ചാണ് നടപടി സ്വീകരിച്ചത്. കേന്ദ്ര സര്‍ക്കാര്‍, മനുഷ്യാവകാശ കമ്മീഷന്‍ എന്നിവരെ കക്ഷി ചേര്‍ത്താണ് നോട്ടീസ് അയച്ചത്.
തലാഖ് ചൊല്ലി വിവാഹമോചനം നടത്തുന്നത് ഏകപക്ഷീയമാണ്. ഇത് ഭരണഘടന അവകാശങ്ങളുടെ ലംഘനമാണെന്നും വിഷയത്തില്‍ ഏകീകൃത നിയമം വേണമെന്നും ആവശ്യപ്പെട്ടു. ഹസിന്‍ ജഹാന്റെ ഹര്‍ജി തലാഖ് ചോദ്യം ചെയ്തുള്ള മറ്റ് ഹര്‍ജികള്‍ക്കൊപ്പം പരിഗണിക്കാനായി കോടതി മാറ്റുകയും ചെയ്തു.
തന്റെയും മുഹമ്മദ് ഷമിയുടെ വിവാഹം മുസ്ലീം ആചാര പ്രകാരമാണ് നടന്നത്. 2014ല്‍ കൊല്‍ക്കത്തയില്‍ വച്ച് ബന്ധുക്കളുടെ സാന്നിധ്യത്തില്‍ നടന്ന വിവാഹം പിന്നീട് നിയമപരമായി രജിസ്റ്റര്‍ ചെയ്യുകയായിരുന്നു. എന്നാല്‍ കഴിഞ്ഞവര്‍ഷം ജൂലായില്‍ തന്നെ തലാഖ് ചൊല്ലി ബന്ധം വേര്‍പ്പെടുത്തിയെന്ന് കാട്ടി ഷമി നോട്ടീസ് നല്‍കിയെന്നും ഇതിന് മറുപടി നല്‍കിയെന്നും സുപ്രീം കോടതിയില്‍ സമര്‍പ്പിച്ച ഹര്‍ജിയില്‍ ജഹാന്‍ വ്യക്തമാക്കി.
തലാഖ്-ഇ-ഹസന്‍ മുന്‍നിറുത്തി ഭര്‍ത്താവ് തന്നെ തലാഖ് ചൊല്ലി. ഇത് വിവേചനപരവും ഭരണഘടനയുടെ 14,15,21, 25 അനുഛേദങ്ങളുടെ ലംഘനവുമായതിനാല്‍ നിരോധിക്കണമെന്നുമാണ് ഹര്‍ജിയില്‍ ആവശ്യപ്പെട്ടത്. സ്ത്രീയുടെ അവകാശത്തെ പരിഗണിക്കാതെ ഏകപക്ഷീയമായ നടപടിയാണിതെന്നും ഹര്‍ജിയില്‍ പറയുന്നുണ്ട്. അഭിഭാഷകന്‍ ദീപക് പ്രകാശാണ് ഹസിന്‍ ജഹാനായി സുപ്രീം കോടതിയില്‍ ഹാജരായത്.
പ്രതികരിക്കാൻ ഇവിടെ എഴുതുക: