ന്യൂദല്‍ഹി: നാലു ചക്രവാഹനങ്ങളുടെ കാര്യത്തില്‍ ഇന്ത്യയുടെ മുഖം മാറുന്നു. അടുത്ത പത്ത് വര്‍ഷത്തിനകം, അതായത് 2033നകം ഉപയോഗിക്കുന്ന നാലു ചക്രവാഹനങ്ങളില്‍ 75 ശതമാനവും വൈദ്യുതവാഹനങ്ങളാക്കണമെന്ന് കേന്ദ്രസര്‍ക്കാരിന് നിര്‍ദേശം.
അന്തരീക്ഷ മലിനീകരണം കുറയ്‌ക്കുന്നതിനും ഹരിത ഊർജ ഉപയോഗം പ്രോൽസാഹിപ്പിക്കുന്നതിനുമായി പെട്രോളിയം മന്ത്രാലയത്തിന്റെ കീഴിലെ ഊര്‍ജ പരിവര്‍ത്തന ഉപദേശക സമിതിയാണ് ഈ നിര്‍ദേശം കേന്ദ്രസര്‍ക്കാരിന് മുന്നില്‍വെച്ചിരിക്കുന്നത്. 2027ഓടെ ഇന്ത്യയില്‍ നാലു ചക്ര ഡീസല്‍ വാഹനങ്ങള്‍ നിരോധിക്കാനും കേന്ദ്രസര്‍ക്കാരിന് നല്‍കിയ നിര്‍ദേശത്തില്‍ പറയുന്നു.
രാജ്യത്തെ എല്ലാ നഗരങ്ങളിലും 2027ഓടെ ഡീസല്‍ ഉപയോഗിച്ചോടുന്ന നാലു ചക്ര വാഹനങ്ങള്‍ നിരോധിക്കണമെന്നാണ് ശുപാർശ. നഗരങ്ങളില്‍ സര്‍വിസ് നടത്തുന്ന ഡീസല്‍ ബസുകള്‍ 2024 മുതല്‍ ഒഴിവാക്കണമെന്നും 2030 ഓടെ, ഇലക്ട്രിക് അല്ലാത്ത സിറ്റി ബസുകള്‍ക്ക് അനുമതി നല്‍കരുതെന്നും മുന്‍ പെട്രോളിയം സെക്രട്ടറി തരുണ്‍ കപൂര്‍ അധ്യക്ഷനായ സമിതി നിര്‍ദേശത്തില്‍ പറയുന്നു.
രാജ്യത്ത് വൈദ്യുത വാഹനങ്ങളുടെ ഉപയോഗത്തിന് ആവശ്യമായ പ്രോത്സാഹനം നൽകുന്നതിന്, ഇലക്ട്രിക്, ഹൈബ്രിഡ് വാഹനങ്ങളുടെ ഫാസ്റ്റർ അഡോപ്ഷൻ ആൻഡ് മാനുഫാക്ചറിംഗ് സ്‌കീമിന് (ഫെയിം) കീഴിൽ നടത്തുന്ന പദ്ധതികൾ “വിപുലീകരിക്കുന്നത്” മാർച്ച് 31നുശേഷവും സർക്കാർ പരിഗണിക്കണമെന്നും റിപ്പോർട്ട് നിർദ്ദേശിച്ചു.
പ്രതികരിക്കാൻ ഇവിടെ എഴുതുക: