ഈ വർഷത്തെ കുഞ്ഞുണ്ണി പുരസ്കാര സമർപ്പണം പത്തിന് കൊല്ലം ശങ്കർനഗർ ലൈബ്രറി ഹാളിൽ

കൊല്ലം: ബാലസാഹിതീ പ്രകാശൻ കുഞ്ഞുണ്ണിമാഷിന്റെ പേരിൽ ഏർപ്പെടുത്തിയ ഈ വർഷത്തെ കുഞ്ഞുണ്ണി പുരസ്കാരം ഈ മാസം പത്തിന് ബാലസാഹിത്യകാരൻ മണി കെ ചെന്താപ്പൂരിന് സമർപ്പിക്കും. കൊല്ലം ചിന്നക്കട ശങ്കർനഗർ ലൈബ്രറി ഹാളിൽ ബുധനാഴ്ച വൈകിട്ട് 5.30ന് നടക്കുന്ന സമ്മേളനത്തിൽ മുൻ ഡിജിപി ഡോ. അലക്സാണ്ടർ ജേക്കബ് ഐപിഎസ് പുരസ്കാര സമർപ്പണം നിർവഹിക്കും.  

കുട്ടികളുടെ ഹൃദയതാളങ്ങൾ തിരിച്ചറിഞ്ഞ് അവർക്ക് ഇഷ്ടപ്പെട്ട ധാരാളം കഥകളും കവിതകളും ഒരുക്കി നൽകിയ അനുഗൃഹീത ബാലസാഹിത്യകാരനാണ് മണി കെ ചെന്താപ്പുര്. കുഞ്ഞുണ്ണിമാഷിന്റെ ജന്മദിനത്തിൽ നടക്കുന്ന സമ്മേളനത്തിൽ ബാലഗോകുലം സംസ്ഥാന അധ്യക്ഷൻ ആർ. പ്രസന്നകുമാർ ബഹുമതിപത്രം സമർപ്പിക്കും. വിദ്യാഭ്യാസ വിചക്ഷണനും സാഹിത്യ നിരൂപകനുമായ ഡോ ഗോപി പുതുക്കോട് കുഞ്ഞുണ്ണി അനുസ്മരണ ഭാഷണം നടത്തും.  

ബാലസാഹിതീപ്രകാശൻ ജനറൽ സെക്രട്ടറി യു.പ്രഭാകരൻ സ്വാഗതവും ചെയർമാൻ എൻ. ഹരീന്ദ്രൻ മാസ്റ്റർ അധ്യക്ഷ ഭാഷണവും നടത്തും. പുരസ്ക്കാര ജേതാവ് മണി കെ ചെന്താപ്പൂര് മറുപടി പ്രസംഗം നടത്തും. ബാലഗോകുലം കൊല്ലം മേഖല അധ്യക്ഷൻ എൻ. എസ് ഗിരീഷ് ബാബു  കൃതജ്ഞത രേഖപ്പെടുത്തും.