കൊല്ലം : പ്രധാനമന്ത്രി മത്സ്യസംപദായോജന പദ്ധതിയില്‍(പിഎംഎംഎസ്‌വൈ) ഉള്‍പ്പെടുത്തി പരമ്പരാഗത മത്സ്യത്തൊഴിലാളികള്‍ക്ക് ആഴക്കടല്‍ മത്സ്യബന്ധനയാനങ്ങള്‍ വിതരണം ചെയ്യുന്നതിന്റെ സംസ്ഥാനതല ഉദ്ഘാടനം ഇന്ന് കൊല്ലത്ത്. നീണ്ടകര വാര്‍ഫില്‍ ഉച്ചയ്‌ക്ക് ശേഷം മൂന്നു മണിക്ക് നടക്കുന്ന ചടങ്ങില്‍ കേന്ദ്ര ഫിഷറീസ് മൃഗസംരക്ഷണ ക്ഷീര വികസന വകുപ്പ് മന്ത്രിപര്‍ഷോത്തം രൂപാല മുഖ്യാതിഥിയായി പങ്കെടുക്കും. മുഖ്യമന്ത്രി പിണറായി വിജയന്‍ പദ്ധതിയുടെ ഉദ്ഘാടനം നിര്‍വ്വഹിക്കും.
കേന്ദ്ര ഗവണ്മെന്റും സംസ്ഥാനഫിഷറീസ് വകുപ്പും ചേര്‍ന്നാണ്പദ്ധതി നടപ്പാക്കുന്നത്. സുരക്ഷിതമല്ലാത്ത ബോട്ടുകളില്‍ ആഴക്കടല്‍ മത്സ്യബന്ധനം നടത്തുന്ന പരമ്പരാഗത മത്സ്യത്തൊഴിലാളികളെ ഘട്ടം ഘട്ടമായി സുരക്ഷിതമായതും സുസ്ഥിര- യന്ത്രവല്‍കൃത മത്സ്യബന്ധനരീതിയിലേയ്‌ക്ക് മാറ്റുന്നതിനായാണ് പദ്ധതി. മത്സ്യത്തൊഴിലാളി പ്രാഥമിക സഹകരണ സംഘങ്ങളിലെ അംഗങ്ങളായ 10 പരമ്പരാഗത മത്സ്യത്തൊഴിലാളികള്‍ ഉള്‍പ്പെടുന്ന 5 ഗ്രൂപ്പുകള്‍ക്കാണ് ആദ്യഘട്ടത്തില്‍ ആഴക്കടല്‍ യാനങ്ങള്‍ നല്‍കുന്നത്. പിഎംഎംഎസ്‌വൈ മാര്‍ഗ്ഗനിര്‍ദ്ദേശം അനുസരിച്ച് പദ്ധതി പ്രകാരം യൂണിറ്റ് ചെലവ് 120 ലക്ഷം രൂപയാണ്. അതില്‍ 40% ഗവണ്മെന്റ് സബ്‌സിഡിയും 24% കേന്ദ്ര വിഹിതവും 16% സംസ്ഥാന വിഹിതവും 60% ഗുണഭോക്തൃവിഹിതവുമാണ്. എന്നാല്‍ ഗുണഭോക്തൃ ഗ്രൂപ്പുകളില്‍ നിന്നുള്ള ആവശ്യം പരിഗണിച്ച് വര്‍ദ്ധിച്ച മത്സ്യസംഭരണ ശേഷി, ശീതീകരണ സൗകര്യങ്ങള്‍, എഞ്ചിന്‍ ശേഷി തുടങ്ങിയ ചില അധിക സൗകര്യങ്ങള്‍ ഉള്‍പ്പെടുത്തി കൊച്ചിന്‍ ഷിപ്പ് യാര്‍ഡ് രൂപകല്‍പന ചെയ്ത ഒരു യാനത്തിന്റെ വില 157 ലക്ഷം രൂപയാണ്.
പരമ്പരാഗത മത്സ്യത്തൊഴിലാളികള്‍ക്ക് ഗുണഭോക്തൃവിഹിതം വഹിക്കാന്‍ കഴിവില്ലാത്ത സാഹചര്യം പരിഗണിച്ച്, സബ്‌സിഡി കൂടാതെ ഓരോ യൂണിറ്റിനും സംസ്ഥാന ഗവണ്മെന്റ്30.06 ലക്ഷം (ഗുണഭോക്തൃവിഹിതത്തിന്റെ 30%) രൂപയുടെ അധിക ധനസഹായം കുടി അനുവദിച്ചിട്ടുണ്ട്. ഗുണഭോക്തൃവിഹിതത്തിന്റെ ബാക്കി 70% തുക മുഖ്യമന്ത്രിയുടെ സംരംഭകത്വ വികസന പരിപാടി (സിഎംഇഡിപി) യിലൂടെ കേരള ഫിനാന്‍ഷ്യല്‍ കോര്‍പ്പറേഷന്‍ വഴി 5% പലിശ നിരക്കില്‍ വായ്പയായും അനുവദിച്ചു.
പ്രതികരിക്കാൻ ഇവിടെ എഴുതുക: