കൊല്ക്കത്ത: ബാറ്റിങ്ങില് ഇഴഞ്ഞുനീങ്ങുന്ന രഹാനെ ഐപിഎല്ലില് വെടിക്കെട്ട് ബാറ്റിങ്ങുമായി കളംനിറയുകയാണ് ചെന്നൈ സൂപ്പര് കിങ്സ് താരമായ അജിന്ക്യ രഹാനെ. ഞായറാഴ്ച കൊല്ക്കത്ത നൈറ്റ് റൈഡേഴ്സിനെതിരായ കളിയില് മറ്റൊരു നാഴികക്കല്ലും രഹാനെ സ്വന്തമാക്കി. കളിയിലെ താരമായതോടെ ഐപിഎല്ലില് ഏറ്റവും കൂടുതല് പ്ലെയര് ഓഫ് ദ മാച്ച് പുരസ്കാരങ്ങള് നേടിയ താരങ്ങളില് ഗൗതം ഗംഭീര്, രവീന്ദ്ര ജഡേജ എന്നിവര്ക്കൊപ്പമെത്തി രഹാനെ. 13 തവണയാണ് ഇവര് കളിയിലെ താരമായി മാറിയിട്ടുള്ളത്.
മൂവരും ഏറ്റവും കൂടുതല് പുരസ്കാരം നേടിയവരുടെ പട്ടികയില് ആറാമതാണ്. രോഹിത് ശര്മ്മ (19), എം.എസ്. ധോണി (17), യൂസഫ് പത്താന് (16), വിരാട് കോഹ്ലി (15), സുരേഷ് റെയ്ന (14) എന്നിവരാണ് ഗംഭീറിനും ജഡേജയ്ക്കും രഹാനെയ്ക്കും മുന്നിലുള്ളത്. ഐപിഎല്ലില് ഏഴ് വര്ഷത്തിനിടെ അജിന്ക്യ രഹാനെയുടെ ആദ്യ മാന് ഓഫ് ദ് മാച്ച് പുരസ്കാരമാണിത്. ഇതിന് മുമ്പ് 2016ലാണ് രഹാനെ മാന് ഓഫ് ദ മാച്ച് പുരസ്കാരം നേടിയത് എന്നതും ശ്രദ്ധേയമാണ്.
ട്വന്റി 20 തനിക്ക് പറ്റിയ ഫോര്മാറ്റല്ല എന്ന് വിമര്ശിച്ചവര്ക്ക് മുന്നില് വെടിക്കെട്ട് ബാറ്റിംഗുമായി ഐപിഎല്ലിന്റെ ഈ സീസണില് കളംനിറയുകയാണ് അജിന്ക്യ രഹാനെ. കൊല്ക്കത്ത നൈറ്റ് റൈഡേഴ്സിനെതിരെ 29 പന്തില് ആറ് ഫോറും അഞ്ച് സിക്സും സഹിതം പുറത്താവാതെ 71 റണ്സ് നേടി രഹാനെ ഏവരേയും അമ്പരപ്പിച്ചിരുന്നു. കൊല്ക്കത്ത നൈറ്റ് റൈഡേഴ്സിനെതിരെ
കൊല്ക്കത്ത ഈഡന് ഗാര്ഡന്സില് 49 റണ്സിന്റെ മിന്നും വിജയമാണ് ധോണിയും സംഘവും നേടിയത്. ആദ്യം ബാറ്റ് ചെയ്ത സിഎസ്കെ 20 ഓവറില് 4 വിക്കറ്റ് നഷ്ടത്തില് 235 റണ്സാണ് അടിച്ചുകൂട്ടിയത്. ചെന്നൈക്കായി ഡേവോണ് കോണ്വെ (56), അജിങ്ക്യ രഹാനെ (71*), ശിവം ദുബെ (50) എന്നിവര് മികച്ച പ്രകടനം കാഴ്ചവെച്ചു. കെകെആറിന്റെ മറുപടി ബാറ്റിങ് 20 ഓവറില് എട്ട് വിക്കറ്റ് നഷ്ടത്തില് 186 റണ്സില് അവസാനിച്ചു. 26 പന്തില് 61 റണ്സെടുത്ത ജേസണ് റോയിയാണ് ടോപ് സ്കോറര്. റിങ്കു സിംഗ് 53 റണ്സ് നേടി. തുഷാര് ദേശ്പാണ്ഡെയും മഹീഷ് തീക്ഷനയും രണ്ട് വീതവും ആകാശ് സിംഗും മൊയീന് അലിയും രവീന്ദ്ര ജഡേജയും മതീഷ പതിരാനയും ഓരോ വിക്കറ്റും സ്വന്തമാക്കി.
ജന്മഭൂമി ഓണ്ലൈന്