കൊച്ചി : പ്രധാനമന്ത്രിയുടെ കേരള സന്ദര്‍ശനം ജനങ്ങള്‍ വളരെ പ്രതീക്ഷയോടെയാണ് കാണുന്നത്. വികസന കുതിപ്പിനും ഇത് ആക്കം കൂട്ടുമെന്ന് ബിജെപി സംസ്ഥാന പ്രസിഡന്റ് കെ. സുരേന്ദ്രന്‍ പറഞ്ഞു. നിരവധി പദ്ധതികളുടെ ഉദ്ഘാടനവും അദ്ദേഹം ഇതോടൊപ്പം നിര്‍വഹിക്കും. എറണാകുളത്ത് വാര്‍ത്താസമ്മേളനത്തില്‍ പങ്കെടുത്ത് സംസാരിക്കുകയായിരുന്നു അദ്ദേഹം.
24 ന് വൈകിട്ട് അഞ്ച് മണിക്ക് പ്രധാനമന്ത്രി പങ്കെടുക്കുന്ന റോഡ് ഷോ കൊച്ചയില്‍ നടക്കും. യുവം പരിപാടിയില്‍ ഡിവൈഎഫ് ഐക്കും കോണ്‍ഗ്രസിനും ആശങ്കയുണ്ട്. അത് രാഷ്‌ട്രീയ പ്രേരിതമായി നടത്തുന്ന സമ്മേളനമല്ല. കേരളത്തിന് വികസന കാര്യത്തില്‍ മറ്റ് സംസ്ഥാനങ്ങളോടൊപ്പം ഓടി എത്താനാകുന്നില്ല. എല്ലാ അവസരങ്ങളും ഉണ്ടായിട്ടും കേരളം കിതയ്‌ക്കുന്നു. നല്ല സാഹചര്യം ഉണ്ടായിട്ടും വിദ്യാര്‍ത്ഥികള്‍ പുറത്ത് പോയി പഠിക്കുന്നു. കേരളം ഇനിയും നിക്ഷേപ സൗഹൃദ സംസ്ഥാനമായി മാറിയിട്ടില്ല. ഇക്കാര്യമെല്ലാം യുവം വേദിയില്‍ ചര്‍ച്ചയാകും.
പ്രധാനമന്ത്രിയുടെ പരിപാടിയില്‍ പങ്കെടുക്കാന്‍ താല്‍പ്പര്യം അറിയിച്ച് നിരവധിപേര്‍ എത്തുന്നുണ്ട്. കേരളത്തിന്റെ വികസനം ആഗ്രഹിക്കുന്ന യുവജന കൂട്ടായ്മയെയാണ് പരിപാടിയില്‍ പങ്കെടുക്കുന്നത്. പ്രധാനമന്ത്രിയുടെ കേരള സന്ദര്‍ശനം സംസ്ഥാനത്തിന്റെ വികസന പ്രവര്‍ത്തനങ്ങള്‍ക്ക് ആക്കം കൂട്ടുന്ന പദ്ധതികള്‍ക്ക് തുടക്കം കുറിക്കുക തന്നെ ചെയ്യും. കോണ്‍ഗ്രസും സിപിഎമ്മും നടത്തുന്ന കള്ളപ്രചരണം പരിപാടിയുടെ വിജയമാണ് കാണിക്കുന്നത്. സില്‍വര്‍ലൈനിന് പച്ചക്കൊടി എന്ന വ്യാജ പ്രചരണമാണ് സിപിഎം നല്‍കുന്നത്.
പ്രധാനമന്ത്രിയുടെ സന്ദര്‍ശനത്തിന്റെ ഭാഗമായി വിവിധ മതവിഭാഗങ്ങളുമായി കൂടികാഴ്ചയും ഉണ്ടാകും. ക്രൈസ്തവ വിശ്വാസികള്‍ക്കിടയില്‍ മോദിയാണ് ശരി എന്ന അഭിപ്രായമാണുള്ളത്. കഴിഞ്ഞ ഒന്‍പത് വര്‍ഷമായി ഇന്ത്യയില്‍ വര്‍ഗ്ഗീയ കലാപങ്ങള്‍ നടക്കുന്നില്ല. കാശ്മീരില്‍ പോലും രക്തചൊരിച്ചിലില്ല. ന്യൂനപക്ഷങ്ങള്‍ വേട്ടയാടപ്പെടുന്നെന്ന പ്രചരണം തെറ്റാണ്. ഇടതുപക്ഷത്തിനും യുഡിഎഫിനും കാലിനടിയില്‍ നിന്ന് മണ്ണ് ഒലിച്ചു പോകുന്നോ എന്ന ഭയമാണെന്നും അദ്ദേഹം പറഞ്ഞു. പല പാര്‍ട്ടിയില്‍ ഉള്‍പ്പെട്ടവരുമായും ആശയ വിനിമയം തുടരുന്നു. യുവം പരിപാടിയില്‍ മറ്റ് യുവജന സംഘടനകളെ ക്ഷണിച്ചിട്ടില്ലെന്നും സുരേന്ദ്രന്‍ കൂട്ടിച്ചേര്‍ത്തു.
പ്രതികരിക്കാൻ ഇവിടെ എഴുതുക: