കൊച്ചി: അരിക്കൊമ്പനെ എവിടേക്ക് മാറ്റണമെന്ന കാര്യത്തില്‍ സര്‍ക്കാര്‍ തന്നെ സ്ഥലം കണ്ടെത്തണമെന്ന് ഹൈക്കോടതി. സ്ഥലം കണ്ടെത്തുന്നതുവരെ ആനയെ നിരീക്ഷിക്കണം. ചിന്നക്കനാലില്‍ നിന്ന് അരിക്കൊമ്പനെ എങ്ങനെ മാറ്റുമെന്ന കാര്യത്തില്‍ വിശദമായ റിപ്പോര്‍ട്ട് വിദഗ്ധ സമിതിയെ സീല്‍ വെച്ച കവറില്‍ അറിയിക്കണമെന്നും കോടതി പറഞ്ഞു.
സമിതി ഇതിന് അംഗീകാരം നല്‍കിയാല്‍ നടപടിയുമായി മുന്നോട്ടുപോകാമെന്നും ഹൈക്കോടതി വിധി കാക്കേണ്ട ആവശ്യമില്ലെന്നും കോടതി വ്യക്തമാക്കി. കേസ് മെയ് മൂന്നിന് വീണ്ടും പരിഗണിക്കും. എല്ലാ ജില്ലകളിലും ടാസ്‌ക് ഫോഴ്‌സ് ഉടന്‍ തന്നെ രൂപീകരിക്കണമെന്നും കോടതി നിര്‍ദേശിച്ചു. ഇടുക്കിയിലും വയനാട്ടിലും പാലക്കാട്ടും ആദ്യം ടാസ്‌ക് ഫോഴ്‌സ് രൂപീകരിക്കണമെന്നും കോടതി പറഞ്ഞു. ‘എന്നാല്‍ ടാസ്‌ക് ഫോഴ്‌സില്‍ ഒരാള്‍ക്ക് ഉത്തരവാദിത്തം വേണം. അത് ഡി എഫ് ഒ ആയാലും വൈല്‍ഡ് ലൈഫ് വാര്‍ഡന്‍ ആയാലും പ്രശ്‌നമില്ല’, കോടതി വ്യക്തമാക്കി.
അതേസമയം വനം വകുപ്പിനെ ഹൈക്കോടതി രൂക്ഷമായി വിമര്‍ശിച്ചു. എങ്ങനെ പണി എടുക്കാതിരിക്കാം എന്നാണ് വനം വകുപ്പ് നോക്കുന്നതെന്നും ആര്‍ക്കും ഉത്തരവാദിത്തം ഏറ്റെടുക്കാന്‍ പറ്റില്ലെന്നും കോടതി വിമര്‍ശിച്ചു. അരിക്കൊമ്പനെ എവിടേക്ക് മാറ്റണമെന്ന സര്‍ക്കാര്‍ നിര്‍ദേശം പരസ്യപ്പെടുത്തരുതെന്നും കോടതി നിര്‍ദേശിച്ചു.
പ്രതികരിക്കാൻ ഇവിടെ എഴുതുക: