കോട്ടയം : മുന്‍ മുഖ്യമന്ത്രിയും മുതിര്‍ന്ന കോണ്‍ഗ്രസ് നേതാവുമായ ഉമ്മന്‍ ചാണ്ടിയുടെ ചികിത്സാ പുരോഗതി മെഡിക്കല്‍ ബോര്‍ഡ് ചേര്‍ന്ന് വിലയിരുത്തണമെന്ന് വീണ്ടും സഹോദരന്‍. സര്‍ക്കാരിന് അയച്ച കത്തിലാണ് സഹോദരന്‍ അലക്സ് വി. ചാണ്ടി ഇക്കാര്യം ആവശ്യപ്പെട്ടിരിക്കുന്നത്. ഉമ്മന്‍ ചാണ്ടിക്ക് മതിയായ ചികിത്സ നല്‍കുന്നില്ലെന്നാണ് കത്തില്‍ ആരോപിക്കുന്നത്.
ഉമ്മന്‍ചാണ്ടി ചികിത്സയില്‍ കഴിയുന്ന ബെംഗളൂരുവിലെ എച്ച്‌സിജി ആശുപത്രിയുമായി സര്‍ക്കാര്‍ രൂപം നല്‍കുന്ന മെഡിക്കല്‍ ബോര്‍ഡ് കൂടിക്കാഴ്ച നടത്തണം. അടുത്ത ബന്ധുക്കളുടെ നിലപാടുകള്‍ കാരണം ശാസ്ത്രീയവും പര്യാപ്തവുമായ ചികിത്സകളല്ല അദ്ദേഹത്തിന് കിട്ടുന്നത്. മെഡിക്കല്‍ ബോര്‍ഡ് രൂപീകരിച്ച് ഓരോ ദിവസത്തേയും ചികിത്സാ പുരോഗതി മുഖ്യമന്ത്രിയേയും ആരോഗ്യമന്ത്രിയേയും അറിയിക്കാനുള്ള സംവിധാനം വേണം.
കേരളത്തില്‍ ചികിത്സ ആയിരുന്നപ്പോള്‍ ഉമ്മന്‍ചാണ്ടിയുടെ ആരോഗ്യസ്ഥിതിയും ചികിത്സാ പുരോഗതിയും അറിയാന്‍ സാഹചര്യമുണ്ടായിരുന്നു. എന്നാല്‍ ബെംഗളൂരുവിലേക്ക് മാറ്റിയതോടെ ഒന്നും അറിയാന്‍ സാധിക്കുന്നില്ല. അതിനാല്‍ ചികിത്സാ വിവരങ്ങള്‍ ബന്ധുക്കളേയും അറിയിക്കണമെന്നും കത്തില്‍ പറയുന്നുണ്ട്.
ഉമ്മന്‍ചാണ്ടിക്ക് കുടുംബം മതിയായ ചികിത്സ നല്‍കുന്നില്ലെന്ന് നേരത്തേയും അലക്സ് വി. ചാണ്ടി ആരോപിച്ചിരുന്നു. ഇതിനു പിന്നാലെയാണ് സംസ്ഥാന സര്‍ക്കാര്‍ മുന്‍കൈയെടുത്ത് ഉമ്മന്‍ചാണ്ടിയെ ബെംഗളൂരുവിലെ ആശുപത്രിയിലേക്ക് മാറ്റിയത്.
പ്രതികരിക്കാൻ ഇവിടെ എഴുതുക: