പ്രധാനമന്ത്രിയേയും യോഗി ആദിത്യനാഥിനേയും വധിക്കുമെന്ന് ഭീഷണി; പ്ലസ് വണ്‍ വിദ്യാര്‍ത്ഥി പിടിയില്‍, ജുവനൈല്‍ കോടതിയില്‍ ഹാജരാക്കി ജാമ്യത്തില്‍ വിട്ടു

ന്യൂദല്‍ഹി : പ്രധാനമന്ത്രി നരേന്ദ്ര മോദിയേയും ഉത്തര്‍പ്രദേശ് മുഖ്യമന്ത്രി യോഗി ആദിത്യനാഥിനേയും വധിക്കുമെന്ന് ഭീഷണിപ്പെടുത്തി ഇമെയില്‍ സന്ദേശം അയച്ച 16 വയസ്സുകാരന്‍ പിടിയില്‍. ലഖ്‌നൗ ചിന്‍ഹട്ടില്‍ നിന്നുള്ള കുട്ടിയാണ് ഇമെയില്‍ സന്ദേശം അയച്ചത്.  

പ്ലസ് വണ്‍ വിദ്യാര്‍ത്ഥിയാണ് പിടിയിലായത്. പ്രധാനമന്ത്രിയേയും ആദിത്യനാഥ് യോഗിയേയും വധിക്കുമെന്നായിരുന്നു ഭീഷണി സന്ദേശം. ഒരു മീഡിയ ഹൗസിലേക്കാണ് ഈ സന്ദേശം ലഭിച്ചത്. തുടര്‍ന്ന് ഏപ്രില്‍ 5ന് സെക്ടര്‍ 20 പോലീസ് സ്റ്റേഷനില്‍ കേസ് രജിസ്റ്റര്‍ ചെയ്ത് അന്വേഷിക്കുകയായിരുന്നു.  

മീഡിയ ഹൗസിന്റെ പരാതിപ്രകാരം ഐപിസി സെക്ഷന്‍ 153എ(1ബി)505(1ബി)506, 507തുടങ്ങിയ വകുപ്പുകള്‍ ചുമത്തിയാണ് കേസെടുത്തിരിക്കുന്നത്. ജുവനൈല്‍ കോടതിയില്‍ ഹാജരാക്കിയ പ്രതിയെ പിന്നീട് ജാമ്യത്തില്‍ വിട്ടതായി ഏജന്‍സി റിപ്പോര്‍ട്ടില്‍ പറയുന്നുണ്ട്. ഇ-മെയില്‍ സന്ദേശത്തിന്റെ ഉറവിടം കണ്ടെത്തിയത് ടെക്‌നിക്കല്‍ ടീമിന്റെ സഹായത്തോടെയാണെന്ന് നോയിഡ എസിപി രജനീഷ് വര്‍മ പറഞ്ഞു.