ചന്ദനകള്ളക്കടത്തിന്റെ പശ്ചാത്തലത്തില്‍ കഥ പറയുന്ന തെലുങ്ക് സിനിമയായിരുന്നു പുഷ്പ. കളക്ഷനില്‍ റെക്കോഡ് സൃഷ്ടിച്ചു ഈ അല്ലു അര്‍ജുന്‍-രശ്മിക മന്ദന ചിത്രം. ഇപ്പോള്‍ പുഷ്പയുടെ രണ്ടാം ഭാഗത്തിലും നായികയായി രശ്മിക മന്ദനയെ തീരുമാനിച്ചതായി നിര്‍മ്മാതാക്കള്‍ പ്രഖ്യാപിച്ചു.
രശ്മികയുടെ 27 ജന്മദിനമായ ബുധനാഴ്ച ആശംസകള്‍ അറിയിച്ച സന്ദേശത്തോടൊപ്പമാണ് ചിത്രത്തിന്റെ നിര്‍മ്മാതാക്കളായ മൈത്രി മൂവി മേക്കേഴ്സ് രശ്മിക പുഷ്പയുടെ രണ്ടാംഭാഗമായ പുഷ്പ ദ റൂളിലും ശ്രീവല്ലിയായി അഭിനയിക്കുമെന്ന് ട്വിറ്ററിലൂടെ വെളിപ്പെടുത്തിയത്. പുഷ്പ ദ റൂളിന്റെ ടീസറും രശ്മികയുടെ ജന്മദിനത്തില്‍ ട്വിറ്ററില്‍ പങ്കുവെച്ചിട്ടുണ്ട്. ചുവന്ന ബ്ലൗസ് ധരിച്ച്, ചുവന്നപൊട്ട് തൊട്ട്, ചിരിയ്‌ക്കുന്ന നാടന്‍ ശ്രീവല്ലിയായാണ് രശ്മികയുടെ പുതിയ ലുക്ക്.
നായകന്‍ അല്ലു അര്‍ജുന്‍ തന്നെ. പുഷ്പയ്‌ക്ക് വേണ്ടിയുള്ള വേട്ട ഏപ്രില്‍ 7ന് തുടങ്ങുമെന്നും നിര്‍മ്മാതാക്കള്‍ അറിയിച്ചിട്ടുണ്ട്. അന്നാണ് അല്ലു അര്‍ജ്ജുന്റെ ജന്മദിനം. അന്ന് അല്ലു അര്‍ജുന്റെ പുഷ്പയുടെ ലുക്ക് പുറത്തുവിടും. ” എവിടെയാണ് പുഷ്പ? പുഷ്പയ്‌ക്ക് വേണ്ടിയുള്ള അന്വേഷണം ഉടനെ അവസാനിക്കും. ഏപ്രില്‍ 7ന് വൈകുന്നേരം 4.05 ന് വെളിപ്പെടുത്തും (നായകന്റെ ലുക്ക്) “- ട്വിറ്റര്‍ സന്ദേശത്തില്‍ പറയുന്നു.
ഫഹദ് ഫാസിലിന്റെ പേരും ട്വീറ്റിലുണ്ട്. ഡിഎസ് പിയായി വീണ്ടും ഫഹദ് ഫാസില്‍ തന്നെ വന്നേയ്‌ക്കുമെന്ന് കരുതുന്നു. സുകുമാറാണ് സംവിധായകന്‍. സിനിമ 2024ല്‍ പുറത്തുവരും.
പ്രതികരിക്കാൻ ഇവിടെ എഴുതുക: